SQO-da karantındik shekteýler jeńildetildi

PETROPAVL. QazAqparat – Soltústik Qazaqstan oblysynda óńirdiń «jasyl» aımaqqa ótýine baılanysty birqatar kásipkerlik nysandarynyń jumys isteýine ruqsat berildi, dep habarlaıdy QazAqparat tilshisi.

SQO-nyń bas memlekettik sanıtar dárigeri Áset Jumataevtyń jańa qaýlysy shyqty. 25 sáýirden bastap óńirde karantındik shekteý sharalary jeńildetilmek.

Ónerkásip, qurylys, aýyl jáne balyq sharýashylyǵy, áýe baılanysy, qyzmet kórsetý oryndary, týrıstik kompanııalar, túrli saýda oryndary, mýzeıler men kitaphanalar, balalardyń bilim berý ortalyqtary, bazarlar, mektepke deıingi bilim mekemeleri, dinı nysandar, monshalar men saýnalar, basseınder, sport keshenderi men teatr, kınoteatr, bılıardtar, boýlıngter jumysyn jandandyrady. Alaıda, keıbirinde adam sanyna qatysty shekteýler bar. Sondaı-aq, maska taǵý, ara qashyqtyqty saqtaý sekildi talaptardy ustaný qajet.

Degenmen, oıyn-saýyq is-sharalaryn, kórmelerdi, forýmdardy, konferentsııalardy, sondaı-aq otbasylyq, mereıtoılyq is-sharalardy ótkizýge áli de tyıym salynǵan.

Eske alýdy sharalaryn 30% syıymdylyqpen, biraq 50 adamnan asyrmaı jáne sporttyq is-sharalardy oryn sanyn 20% asyrmaı kórermendermen ótkizýge ruqsat berildi.

26 sáýirden bastap óńirdegi fıtnes-klýbtar, onyń ishinde ıoga ortalyqtary, spa-ortalyqtar, saýnalar, basseınder, kompıýterlik klýbtar, onyń ishinde PlayStation klýbtary (16 jasqa tolmaǵan tulǵalardan basqa), boýlıng klýbtary, kınoteatrlar, teatrlar men fılarmonııalar, banket zaldary, ashana tıptes nysandar, fastfýdtardy, strıt-fýdtardy qospaǵanda, tamaqtandyrý obektileri, bılıard klýbtary, kontsert zaldary «Ashyq» jobasyna qatysa bastaıdy. 5 mamyrdan bastap bul jobany karaoke men banket zaldaryna engizý josparlanǵan.