SQO-da karantın talaptaryn buzǵandarǵa 30 mln teńgege jýyq aıyppul salyndy

PETROPAVL. QazAqparat – Soltústik Qazaqstan oblysynda karantındik shekteý sharalaryn buzǵandarǵa jyl basynan 464 ákimshilik hattama toltyrylyp, 30 mln teńgege jýyq aıyppul salyndy, dep habarlaıdy QazAqparat tilshisi.

SQO sanıtarııalyq-epıdemıologııalyq baqylaý departamentiniń málimetinshe, óńirde 23 monıtorıngtik top jumys isteıdi. Olar 8 sáýirge deıin 9,5 myń nysandy qamtyp, 1 myń 300-den astam reıd ótkizgen. Nátıjesinde 433 nysanda karantın talaptarynyń saqtalmaǵany anyqtaldy.

«Reıd barysynda jeke tulǵalardyń maska taqpaǵany, adam kóp jınalǵan is-sharalardyń uıymdastyrylǵany, dezınfektsııalyq rejımniń saqtalmaǵany anyqtaldy. Keı saýda oryndarynda satýshylar tutynýshylaryna maskasyz qyzmet kórsetken, azyq-túlikti oramasyz satqan. Keı nysandar belgilengen jumys ýaqytyn saqtamaǵan», - deıdi SQO SEBD bólim bastyǵy Danııar Ospanov.

Osyndaı reıdter barysynda jáne úılestirý ortalyqtaryn jedel habarlandyrý nátıjesinde 464 ákimshilik hattama toltyryldy. 29 mln 902 myń teńgeniń 434 aıyppuly salyndy.

«Sonyń ishinde 2 laýazymdy tulǵaǵa, 4 – zańdy tulǵaǵa, 15 – jeke kásipkerge, 413 – jeke tulǵaǵa aıyppul salyndy. 15 materıal sotqa jiberildi. Árıne, eń kóp quqyq buzýshylyq Petropavlda tirkeldi – 127 jaǵdaı, qalǵandary oblys aýdandarynda anyqtalǵan. 15 ákimshilik materıal quqyq buzýshylyqtyń mańyzynyń tómendigine baılanysty toqtatyldy», - deıdi Danııar Ospanov.

Tyıymǵa qaramastan toı ótkizgender de jazasyz qalmady. Іs-sharany uıymdastyryp, qatysqany úshin 5 jeke kásipker shamamen 1,5 mln teńge aıyppul tóledi. Nysandardyń ákimgerleri men jaýapty tulǵalaryna 218 myń teńgeniń 5 aıyppuly jáne toı ıelerine 700 myń teńgeniń 15 aıyppuly salyndy.