SQO-da karantın talaptaryn buzǵandar anyqtaldy
PETROPAVL. QazAqparat – Soltústik Qazaqstan oblysynda karantın ýaqytynda jumysyn toqtatýy tıis nysandar jumys istep turǵan, dep habarlaıdy QazAqparat tilshisi.
SQO Polıtsııa departamenti baspasóz qyzmetiniń málimetinshe, óńirde 10 kúnniń ishinde karantın talabyn buzýdyń 186 deregi anyqtaldy. Oblysta shekteý sharalary engizilgennen beri monıtorıng toptary qurylyp, jumys isteýde. Olardyń negizgi mindeti – sanıtarlyq-epıdemıologııalyq talaptardyń oryndalýyn qamtamasyz etý.
Polıtseıler, prokýratýra, tótenshe jaǵdaı qyzmetkerleri, sanıtarııalyq dárigerler óńir turǵyndaryn belgilengen shekteýler men tyıymdardy qatań ustanýǵa shaqyrady. Tártip saqshylary kóp jaǵdaıda túsindirý jumysyn azamattardyń sanasyna jáne áleýmettik jaýapkershiligine senim arta júrgizedi. Al talaptar óreskel buzylǵan jaǵdaıda ákimshilik yqpal etý sharalary qoldanylady.
Karantın talabyn saqtamaıtyndardyń basym bóligi oblys ortalyǵynda anyqtaldy. Bul tizimde Aqqaıyń, Tımırıazev, Qyzyljar jáne Esil aýdandary da bar. Munda jumysyn toqtatýǵa mindetti nysandar – demalys oryndary, jekemenshik monshalar jumys istegen. Satýshylar arasynda maska taǵyp, qolǵap kımeıtinder anyqtaldy.
«Aldaǵy demalys kúnderi oblystyń Bas memlekettik sanıtarııalyq dárigeriniń qaýlysyna sáıkes qosymsha shekteý sharalary engiziledi. Júrip-turýdy shekteý qajet, azyq-túlik satatyndarynan basqa barlyq saýda oryndary jabyq bolady. Qurban aıtty merekeleý kúnderi úıde kóp adamnyń jınalýyna tyıym salynǵan. Barlyq belgilengen normalardy saqtaý qajet»,- deıdi SQO Polıtsııa departamenti Jergilikti polıtsııa qyzmeti basqarmasy bastyǵynyń mindetin atqarýshy Grıgorıı Tysh.
