SQO-da karantın talabyn buzǵandarǵa 87,7 mln teńge aıyppul salyndy
SQO Sanıtarııalyq-epıdemıologııalyq baqylaý departamenti baspasóz qyzmetiniń málimetinshe, óńirde karantın bastalǵaly ákimshilik quqyqbuzýshylyq týraly 1566 hattama toltyryldy. Onyń basym bóligi – 1441-i jeke tulǵalarǵa qatysty. Budan basqa 123 kásipkerlik sýbektisine jáne 2 laýazymdy tulǵa jaýapqa tartyldy. Jalpy salynǵan aıyppuldyń mólsheri – 87,7 mln teńge.
«Sanıtarııalyq dárigerler qazir tekseriske shyqpaıdy. Quramynda tártip saqshylary men prokýratýra ókilderi bar monıtorıngtik toptar jumysyn toqtatqan joq. Olar qoǵamdyq oryndardy, dúkender men saýda nysandaryn, jalpy adam kóp shoǵyrlanǵan jerlerdi nazarǵa alǵan. Aıyppul negizinen maska taqpaǵandarǵa, qolǵap kımegenderge salynady», - deıdi baspasóz qyzmetiniń mamandary.
SQO koronavırýs ınfektsııasynyń taralýy boıynsha «qyzyl aımaqqa» kirgen. Respýblıka boıynsha qazir Pavlodar oblysynan keıin ekinshi tur. Ótken táýlikte óńirde PTR ádisimen 1208 zertteý júrgizildi. Nátıjesinde KVI juqtyrýdyń jańa 75 jaǵdaıy tirkeldi. Onyń 46-sy Petropavlda anyqtalǵan.
Búginde oblysta qaýipti ınfektsııany juqtyrǵandar sany 7089-ǵa jetti.