SQO-da karantın shekteýleri jeńildetildi

PETROPAVL. QazAqparat – Soltústik Qazaqstan oblysynda bas memlekettik sanıtar dárigerdiń jańa qaýlysy shyǵyp, karantın shekteýleri jeńildetildi, dep habarlaıdy QazAqparat tilshisi.

SQO bas memlekettik sanıtar dáriger Áset Jumataevtyń jańa qaýlysyna sáıkes, endi meshitterde bes mezgil namaz oqýǵa ruqsat bar. Alaıda syıymdylyǵyn 30 %-dan, kelýshiler sanyn 100-den asyrmaýlary qajet. Al juma namazyn tek aýyldyq jerlerde ǵana, adam sanyn 30-dan asyrmaı ótkizýge bolady.

Mádenı nysandardyń jumysyna ruqsat berildi, alaıda toptaǵy adam sany 50-den aspaýy qajet. Kitaphana, mýzeıler ashylady.

Saýda-oıyn-saýyq ortalyqtary, saýda ortalyqtary, saýda úıleri saǵat 10.00-den 24.00-ge deıin jumys isteıdi.

Túrli bazarlar jeksenbiden basqa kúnderi saǵat 9.00-den 20.00-ge deıin ashylady. Biraq saýda oryndary kelýshiler sanyn 30 %-dan asyrmaı, 4 sharshy metrde 1 adamnyń bolýyn qadaǵalaýy qajet.

Balalarǵa arnalǵan túrli ortalyqtardyń, kabınetterdiń jumysy jandanady.

Basseınderde jeke adammen jumys isteýge ruqsat berildi.

Qoǵamdyq monshalar, saýnalar saǵat 9.00-den 24.00-ge deıin adam sanyn 50-den asyrmaı, 4 sharshy metrde 1 adamnyń bolýyn qadaǵalaı otyryp jumys isteıdi.

Qoǵamdyq tamaqtaný oryndaryna saǵat 7.00-den 24.00-ge deıin sanıtarlyq talaptardy saqtaı otyryp, ıaǵnı kelýshilerdiń sanyn asyrmaı jumys isteýge ruqsat berildi. Ujymdyq, kóńil kóterý is-sharalaryn ótkizýge áli de tyıym bar.

Teatrlar saǵat 9.00-den 24.00-ge ashylady. Alaıda kelýshiler sanyn 30%-dan asyrmaýlary qajet. Kórermenderin shahmattyq tártippen otyrǵyzýǵa mindetti.

SQO-nyń bas sanıtar dárigeriniń jańa qaýlysy 28 aqpan saǵat 00.00-den kúshine enedi.