SQO-da karantın rejımin jeńildetýdiń ekinshi kezeńi qalaı júrgiziledi
PETROPAVL. QazAqparat – SQO ákimi Qumar Aqsaqalov áleýmettik jelidegi paraqshalarynda karantın rejımin jeńildetýdiń ekinshi kezeńi óńirde qalaı ótetindigin málim etti, dep habarlaıdy QazAqparat tilshisi.
SQO-da 4 mamyrdan bastan karantın rejımi birshama bosańsıdy. Kóptegen bıznes nysandary jumysyn bastap, turǵyndarǵa keıbir qyzmet túrleri qoljetimdi bolmaq. Oblys ákimi Qumar Aqsaqalovtyń aıtýynsha, 13 myń soltústikqazaqstandyq jumysqa shyǵady.
«Óńirde karantın rejımin kezeńmen jeńildetip jatyrmyz. 27 sáýir – birinshi kezeńinde shaǵyn jáne orta kásiporyndar, qyzmet kórsetý, qurylys jáne jol kompanııalary iske qosyldy. 45 myń adam jumys oryndaryna oraldy. Turǵyndar saıajaılaryna barýǵa múmkindik aldy. Al 4 mamyrdan bastap aýmaǵy 500 m² deıingi azyq-túliktik emes dúkender ashylyp, saǵat 17.00-ge deıin jumys isteıtin bolady», - dep jazdy oblys ákimi.
Óńir basshysynyń aıtýynsha, sondaı-aq fotosalondar men gúl dúńgirshikteri, aldyn ala jazylý boıynsha shashtarazdar, medıtsınalyq ortalyqtar men stomatologııalyq klınıkalar, jyljymaıtyn múlik operatsııalary boıynsha kompanııalar, jarnama agenttikteri, notarıýster, mıkroqarjy uıymdary, saqtandyrý kompanııalary men lombardtar, aqsha aıyrbastaý pýnktteri, aqparattyq-kommýnıkatsııalyq tehnologııalar kompanııalary ashylady.
Buǵan deıin turǵyndarǵa aýlaǵa balany shyǵarýǵa ruqsat etilse, endi dalada sporttyq jattyǵý jasaýǵa, júgirýge múmkindik beriledi. Budan basqa Nur-Sultan – Petropavl qalalarynyń arasynda áýe reısi qalpyna keltiriledi.
«Óńir birtindep jandanyp jatyr. Biz aqyryndap úırenshikti turmysqa oralýdamyz. Alaıda, qaýipsizdik sharalaryn umytýǵa bolmaıdy. 2 metr - áleýmettik araqashyqtyqty saqtańyzdar, maska kıińizder, qoǵamdyq oryndarda sanıtaızerlerdi paıdalanyńyzdar. Qatań tártipti ustanǵan jaǵdaıda ǵana biz karantın rejıminen qutylamyz», - dep jazdy Qumar Aqsaqalov.
