SQO-da karantın kezinde jumys istegen saýna anyqtaldy
PETROPAVL. QazAqparat – Petropavlda polıtseıler karantın jaǵdaıyna qaramastan jumys istegen saýnany anyqtady, dep habarlaıdy QazAqparat tilshisi.
SQO Polıtsııa departamenti baspasóz qyzmetiniń málimetinshe, zańsyz jumys istegen saýnany tártip saqshylary reıd barysynda anyqtady.
Petropavldaǵy eki kásipker jeksenbilik keshti saýnada ótkizbekshi bolady. Telefon arqyly qaladaǵy saýnalardyń biriniń ıesimen kelisedi. Ol da tabys tappaq bolypty. Qala turǵyndarynyń demalysyn reıdte júrgen polıtseıler toqtatty.
1981 jáne 1985 jyly týǵan eki turǵyn da, 43 jastaǵy saýna ıesi de tótenshe jaǵdaı rejımin buzǵany úshin jazaǵa tartyldy. Ákimshilik sottyń sheshimimen olardyń barlyǵyna 10 AEK mólsherinde aıyppul salyndy.
«Qaýipti indettiń taralýyna jol bermeý maqsatynda qolǵa alynǵan is-sharalardyń mańyzyn barlyǵy birdeı túsine bermeıdi. Mundaı reıdtik tekserister jazalaý maqsatyn emes, azamattardyń tıisti deńgeıde oqshaýlanýyn qamtamasyz etýdi kózdeıdi. Karantın talaptaryn qatań saqtaý - halyq densaýlyǵyn saqtaýda mindetti shart», - deıdi Petropavl qalalyq PB bastyǵynyń birinshi orynbasary Álibek Ǵabdýllın.
SQO-da tótenshe jaǵdaı rejımin buzǵandarǵa 634 hattama toltyryldy. Kóńil kóterý oryndarynyń – 29 jáne saýda oryndarynyń 27 ıesi jaýapqa tartyldy. Sondaı-aq, 8 adamnyń karantındik oqshaýlaý ornynan shyqqandyǵy anyqtaldy.
