SQO-da qaraqshylar er adam men onyń 12 jastaǵy jıenin baılap, úıdi tonaǵan
PETROPAVL. KAZINFORM – Soltústik Qazaqstan oblysynda polıtseıler qaraqshylyq shabýylǵa kúdikti tórteýdi ustady. Olar Taıynsha aýdanynda turǵynnyń úıine basa-kóktep kirip, shamamen 640 myń teńgeniń dúnıesin alyp ketken.
Vedomstvonyń málimetinshe, qylmys 9 tamyzǵa qaraǵan túni jasalǵan. Belgisiz adamdar 41 jastaǵy aýyl turǵynynyń úıine kirip, ony jáne 12 jastaǵy jıenin skotchpen baılap, úıdegi bar aqshany, eki uıaly telefondy jáne altyn buıymdardy qoldy qylǵan.
Qylmyskerler úıden shyǵyp ketkennen keıin bala qolynyń skotchyn tisimen julyp, bosaǵan. Keıin jaqyn mańdaǵy ýchaskelik polıtsııa ınspektorynyń úıine baryp, bolǵan jaǵdaı týraly habarlaǵan.
Polıtsııanyń barlyq kúshteri dereý kúdiktilerdi izdeýge jumyldyryldy. Tártip saqshylary esepte turǵan adamdardy tekserip, aýylǵa kelgen adamdar men bóten kólikter týraly aqparat jınady.
«Nátıjesinde kúdikti retinde SQO men Aqmola oblysynyń 30 ben 38 jas aralyǵyndaǵy tórt turǵyny anyqtaldy. Taıynsha aýdanynyń polıtsııa bólimi jáne krımınaldyq polıtsııa basqarmasynyń jedel qyzmetkerleri olardy Astana qalasynyń aýmaǵynda ustady. Qazirgi ýaqytta aıyptalýshynyń úsheýi qamaýǵa alyndy. Urlanǵannyń bir bóligi tárkilenip, tonaý faktisi boıynsha sotqa deıingi tergeý júrgizilip jatyr», - deıdi SQO Polıtsııa departamenti krımınaldyq polıtsııa basqarmasynyń bastyǵy Ivan Terzıdı.
Kúdiktilerdiń qaraqshylyq shabýyl jasaǵany dáleldengen jaǵdaıda sot úkimimen olar 7 jyldan 12 jylǵa deıingi merzimge bas bostandyǵynan aıyrylýy múmkin.
Buǵan deıin SQO-da artemia salina shaıanynyń 24 tonna jumyrtqasyn zańsyz óndirgender ustalǵanyn jazǵan edik.
