SQO-da qaraǵaı ormanynyń mańyna statsıonarlyq beketter qoıyldy
PETROPAVL. QazAqparat – Soltústik Qazaqstan oblysynda Jańa jyl meıramy qarsańynda ormanshylar kúsheıtilgen jumys rejımine kóship, qaraǵaı ormandaryn kúzetke aldy, dep habarlaıdy QazAqparat tilshisi.
SQO-da qaraǵaı-shyrshany brakonerlerden qorǵaý úshin ormandardyń mańyna 24 statsıonarlyq beket qoıyldy.
Budan basqa 101 mobıldi top únemi reıdke shyǵyp turady. Byltyr osyndaı zańsyz aǵash kesýdiń aldyn alý is-sharalary óz nátıjesin berdi.
Óńirde jeltoqsan aıynda qaraǵaı-shyrshany ruqsatyz kesýge qatysty bir de bir derek tirkelmedi.
Teplov orman sharýashylyǵynda 18 myń gektar alqapqa aǵash ósken. Onyń 2,5 myńy - qaraǵaı, shyrshalar. Mundaǵy ormanshylar 1 jeltoqsannan bastap kúsheıtilgen jumys rejımine kóshti.
Brakonerlerdi qyzyqtyrýy múmkin ormandardyń mańyna statsıonarlyq beketter qoıyldy. Mamandar munda táýlik boıy kezekshilik etedi. Budan basqa 3 mobıldi brıgada jumys isteıdi.
«Oblysta bıyl da qylqan japyraqtylar negizinen mádenı is-sharalardy ótkizýge beriledi. Komıtet 142 qaraǵaı-shyrshany kesýge ruqsat berdi. Buǵan qosa, «Kondratov tálimbaǵy» 1 myń shyrshany satýǵa shyǵarmaq. Al orman sharýashylyqtaryna qylqan japyraqtylardyń butaqtaryn jáne ydystarda ósken shyrshalardy satýǵa ruqsat berildi», - deıdi SQO tabıǵı resýrstar jáne tabıǵatty paıdalanýdy retteý basqarmasynyń bas mamany Qaırolla Baıteńizov.
Aǵashty zańsyz keskenderge ákimshilik jáne qylmystyq jaýapkershilik bar. Jeke tulǵalarǵa 20 AEK mólsherinde, al kásipkerlik sýbektilerine 200 AEK deıin aıyppul qarastyrylǵan.
Kelgen shyǵyn 100 AEK mólsherinen asqan jaǵdaıda qylmystyq is qozǵalyp, sotqa jiberiledi.
