SQO-da qar jamylǵysyndaǵy sý qory ólshendi, ylǵal mólsheri ádettegiden 15 % joǵary

PETROPAVL. QazAqparat – Soltústik Qazaqstan oblysynda kóktemgi sý tasqynyn boljaý maqsatynda qar jamylǵysyndaǵy ylǵal mólsheri ólshenip jatyr. Kórsetkish kópjyldyq ortasha mánnen 15 % joǵary, keı aýdanda tipti eki ese kóp, dep habarlaıdy QazAqparat tilshisi.

«Qazgıdromet» RMK SQO fılıalynyń málimetinshe, Tótenshe jaǵdaılar mınıstrligi men «Qazgıdromet» RMK arasyndaǵy kóktemgi sý tasqynyn boljaý kezinde jumystardyń ózara is-qımyly týraly birlesken buıryǵyna sáıkes jumystar bastaldy. 23-26 qańtar aralyǵynda SQO-daǵy ózen basseınderiniń mańynda, jyralarda qarda jınalǵan sý qory anyqtalyp jatyr.

Mundaı zertteýler búginge deıin Esil jáne Ǵ. Músirepov atyndaǵy aýdandarda júrgizildi. Esil aýdanyndaǵy jyralar men arqalyqtardaǵy qar jamylǵysyndaǵy sý qory 48,4 mm-ge jetedi. Al, Ǵ.Músirepov atyndaǵy aýdanda ylǵal mólsheri 187 mm, bul ótken jyldyń keı jerlerimen salystyrǵanda 47 % artyq.

Sınoptıkterdiń aıtýynsha, 20 qańtardaǵy jaǵdaı boıynsha SQO Esil ózeni basseınindegi jazyq aýmaqtaǵy qar jamylǵysynyń ylǵal qory kórsetkishteri ortasha kópjyldyq mánnen 15 % joǵary.

Qardaǵy sý qoryn jáne kúzdegi jaýyn-shashynnyń topyraqtaǵy mólsherin taldaı otyryp, sý basý qaýpi bar aımaqtarǵa aldyn-ala baǵalaý júrgizildi. Mamandardyń pikirinshe, bıyl SQO-da kóktemde sý tasqyny bolýy múmkin, óńir táýekel sanatyna engen.

Foto: «Qazgıdromet» RMK oblystyq fılıaly