SQO-da bıyl qar az, toń qalyń

PETROPAVL. KAZINFORM – Soltústik Qazaqstan oblysynda mamandar agrometeorologııalyq baqylaýdyń qorytyndysyn jarııalady. 

«Qazgıdromet» kásiporny SQO fılıalynyń basshysy Qymbat Merǵalımovanyń aıtýynsha, agrometeorologııalyq baqylaý jelisi oblystyń barlyq aýmaǵyn qamtyǵan. Baqylaýlar tek dándi daqyldar egiletin aýdandarda ǵana emes, sonymen qatar jaıylym jerlerde de júrgiziledi.

– Ósimdik sharýashylyǵynyń ónimdiligi 70% aýa raıy jaǵdaılaryna, al qalǵan 30% agrotehnologııalarǵa táýeldi ekeni belgili. Al egý, kútip-baptaý sııaqty jumystardy merziminde júrgizbeý saldarynan ónimniń 40% joǵalýy múmkin. Osyǵan baılanysty agrometeorologııalyq aqparat aýyl sharýashylyǵynda erekshe mańyzǵa ıe.

Oblysta agrometeorologııalyq baqylaý jelisin 2000 jyldan beri 2,3 ese arttyrdyq. Búginde oblys aýmaǵynda 28 baqylaý pýnkti jumys isteıdi, - deıdi Qymbat Merǵalımova.

Óńirde qazir 11 meteorologııalyq stantsııa, 13 avtomatty agrometeorologııalyq beket jáne 4 avtomatty meteorologııalyq stantsııa bar. Mamannyń aıtýynsha, baqylaý pýnktterinen alynǵan derekter agrometeorologııalyq boljamdardy ázirleýge, kóktemgi egistiń tıimdi merzimderi men tásilderin anyqtaýǵa, sondaı-aq zııankester men ósimdik aýrýlarynyń taralý qaýpin boljaýǵa paıdalanylady.

– 1 aqpandaǵy jaǵdaı boıynsha oblysta topyraq 45–146 sm aralyǵynda qatqan, bul 2025 jylmen salystyrǵanda 15–85 sm-ge kóp jáne aýyl sharýashylyǵy úshin qolaısyz.

Qar jamylǵysyndaǵy sý qory 18–52 mm, oblystyń basym bóliginde bul kórsetkish klımattyq normadan jáne ótken jylǵy deńgeıden 27–65% tómen. Tek Tımırıazev jáne Ýálıhanov aýdandarynda normaǵa jýyq.

Qarasha–qańtar aılarynda túsken jaýyn-shashyn mólsheri 37,2–121,9 mm boldy. Oblystyń kóp bóliginde bul normadan 12–67% joǵary, al Aqqaıyń aýdanynda jáne Maǵjan Jumabaev aýdanynyń soltústik bóliginde normadan 39–49% tómen, - deıdi Qymbat Merǵalımova.

Buǵan deıin SQO-da tasqyn qaýpin boljaý úshin qar jamylǵysynyń kórsetkishteri ólshengenin jazǵan edik.