SQO-da qar qursaýynda qalǵan eki balyqshy aman tabylyp, qutqaryldy

PETROPAVL. QazAqparat – Soltústik Qazaqstan oblysynda balyq aýlaýǵa shyqqan eki balyqshy boranǵa urynyp, qar qursaýynda qaldy. Ekinshi kúni er adamdar aman-esen tabylyp, qutqaryldy, dep habarlaıdy QazAqparat tilshisi.

SQO polıtsııa departamenti baspasóz qyzmetiniń málimetinshe, 44 jáne 24 jastaǵy Taıynsha aýdanynyń eki turǵyny oblystyń iri sý aıdyndarynyń biri — Chagly kóline balyq aýlaýǵa barǵan.

Túnde boran bastalyp, olar úıge qaıtpaq bolady. Biraq, qar qursaýynda qalyp, olardyń «VAZ-2110» qalyń qarǵa batady.

Túni boıy boranmen alysqan balyqshylar ózdiginen shyǵa almaıtyndyqtaryn túsinip, tańerteń erte telefon arqyly kómekke júgingen.

Aýdandyq polıtsııa bólimine habar jetisimen, birden ýchaskelik ınspektorlar jolǵa shyqty.

Olar ózderimen birge kóldi jáne onyń aınalasyn jaqsy biletin Chermoshnıanka aýylynyń 48 jastaǵy turǵyny Nıkolaı Dolınenko ala júrgen.

Kóp uzamaı qutqarýshy top álsirep, tońǵan balyqshylardy aman-esen tapty. Óz kúshterimen joldy qardan arshyp, tártip saqshylary qyzmettik «Nıvamen» balyqshylardy jaǵaǵa shyǵardy.

Turǵyndar óz kezeginde qar qursaýynan qutqarǵan tártip saqshylaryna alǵys bildirip, polıtsııa departamentiniń bastyǵyna hat joldady.

«Ásirese aýyldyq jerlerde ýchaskelik polıtsııa ınspektory atqaratyn jumystyń aıasy keń. Ol quqyqtyq tártipti saqtaýdaǵy basty tulǵa, sonymen qatar qoǵamdyq qaýipsizdiktiń túrli máselelerin sheshedi. Qıyn jaǵdaılarda adamdarǵa kómekke jıi keledi. Alǵys sózder qyzmetkerlerdi qoǵamnyń ıgiligi úshin odan ári qyzmet etýge yntalandyrady», - deıdi SQO PD jergilikti polıtsııa qyzmeti basqarmasynyń bastyǵy Aıdyn Baımatov.

Foto: SQO polıtsııa departamenti