SQO-da qar qursaýynda qalǵan aqtóbelik hokkeıshiler alty saǵattan soń qutqaryldy
PETROPAVL. QazAqparat – Soltústik Qazaqstan oblysynda aqtóbelik 28 hokkeıshi mingen avtobýs jolda qalyp, tek 6 saǵattan keıin ǵana qar qursaýynan shyǵaryldy, dep habarlaıdy QazAqparat tilshisi.
SQO Polıtsııa departamenti baspasóz qyzmetiniń habarlaýynsha, Aqtóbe qalasynyń hokkeı komandasy «Tımırıazev-Sarykól» tasjolynda, Tımırıazev aýdanynyń Moskvoretskoe eldimekenine 18 shaqyrymdaı jetpeı jolda qalady. Sportshylar mingen avtobýstyń júrgizýshisi oblys shekarasynan ótisimen, joldy qar alyp jatqanyn baıqap, keri qaıtpaq bolǵan. Alaıda «Neoplan» gabarıtti avtobýstyń arty jol jıegine túsip ketken. Júrgizýshi polıtsııanyń kezekshi bólimine habarlasty.
Oqıǵa ornyna «Qazavtojol» JShS eki arnaıy tehnıkasy jiberilip, polıtsııa qyzmetkerleri, qutqarýshylar, aýdandyq ákimdik ókilderi shyqty. Borannyń saldarynan joldy qar alyp qalǵandyqtan, kómek kútken hokkeıshilerge jetý úshin olarǵa birneshe saǵat kerek boldy. Túski saǵat 12.00-ler shamasynda tehnıka joldy ashyp, qonaqtar mingen avtobýs aýdan ortalyǵy Tımırıazev eldimekenine jóneltildi.
Keıin sportshylar Petropavl qalasyna saparyn jalǵady.
