SQO-da qar qursaýynan jolaýshylar avtobýsy men eki jeńil avtokólik shyǵaryldy
PETROPAVL. QazAqparat – Soltústik Qazaqstan oblysynda ótken táýlikte qar qursaýynan jolaýshylar avtobýsy men eki jeńil avtokólik shyǵaryldy, dep habarlaıdy «QazAqparat» HAA tilshisi.
Oblysta 288 ýchaski qar qursaýyna túsken. Boran kezinde keptelý qaýpi óte joǵary. Oblys turǵyndaryna qolaısyz aýa-raıy týraly aldyn-ala eskertilýde. Jyl basynan beri mundaı habarlamalar kún saıyn kelip jatyr.
5 qańtarda aýa raıyna baılanysty eskertý jarııalandy. Biraq adamdar soǵan qaramastan eldi mekenderden tys jerlerge shyqqan.
TJ departamenti baspasóz qyzmetiniń habarlaýynsha, túnde «Petropavl-Qostanaı» jolaýshylar avtobýsy qar qursaýynda qalǵan. Ol Shalaqyn aýdanynyń Sergeevka aýdany ortalyǵynan 3 shaqyrym jerde 16 jolaýshysymen turyp qalǵan. Avtobýsty tazalanǵan jolǵa «Kırovets» tehnıkasynyń kómegimen shyǵarýǵa týra keldi.
Sol ýaqytta Tımırıazev aýdanynda Yntymaq aýylynan 7 shaqyrym jerde, «Dmıtrıevka-Jarken» avtojolynda qutqarýshylar bes jolaýshysy bar eki jeńil avtokólikti qar qursaýynan shyǵaryp alǵan.
