SQO-da qar qursaýynda qalǵan balyqshy aman-esen qutqaryldy

PETROPAVL. KAZINFORM — Kókshetaý qalasynyń 61 jastaǵy turǵyny Soltústik Qazaqstan oblysyna balyq aýlaýǵa baryp, boranda adasyp ketken. 

SQO polıtsııa departamenti baspasóz qyzmetiniń málimetinshe, er adam «VAZ-2115» avtokóligimen Taıynsha aýdanyndaǵy Qumdykól kóline jol tartqan. Kúndiz aýa raıy qolaıly bolǵanymen, keshke qaraı jel ekpini kúsheıip, boran bastalǵan. Úıine qaıtpaq bolǵan er adam baǵytynan jańylyp, kóligimen qarǵa batyp qalǵan.

Ózdiginen qar qursaýynan shyǵa almasyn bilgen ol saǵat shamamen 21:00–de jergilikti tanysyna habarlasqan.

Er adamdy izdeýge polıtsııa bólimi, tótenshe jaǵdaılar bólimi jáne aýdan ákimdigi qyzmetkerleri jedel jumyldyryldy. Ýchaskelik ınspektor men qutqarýshylar onymen baılanysta bolǵan. Tún ortasynda arnaıy tehnıkanyń kómegimen tártip saqshylary men qutqarýshylar qar basqan avtokólikti taýyp aldy. Balyqshy Makashevka aýylyna evakýatsııalandy. Medıtsınalyq kómek qajet bolǵan joq.

— Qolaısyz aýa raıynda asa qajettilik bolmasa saparǵa shyqpaýǵa, meteoboljamdar men quzyrly qyzmetterdiń habarlamalaryn qadaǵalaýǵa keńes beremiz. Jolǵa shyǵarda jyly kıim men senimdi baılanys quraldaryn ózińizben birge alý qajet, — deıdi polıtseıler.

Buǵan deıin ekspedıtsııa kezinde kóligi buzylǵan sheteldik Kazinform agenttiginen kómek suraǵanyn jazǵan edik.