SQO-da qar qalyń bolǵandyqtan jabaıy ańdar qoldan azyqtandyrylyp jatyr
PETROPAVL. QazAqparat - Jabaıy ańdar ashtan qyrylmaý úshin Soltústik Qazaqstan oblysynyń qoryqshylary olardy qoldan azyqtandyrýǵa kóshti, dep habarlaıdy QazAqparat tilshisi.
Soltústik óńirlerdegi uzaq, ári aıazdy qysta jabaıy ańdarǵa azyq tabý qıyn. Bıyl burynǵydan qar qalyń tústi. Omby qarmen júrip sharshaıtyn ańdar azyqsyz qalýy múmkin. Qoryqtaǵy janýarlardy kóktemge aman jetkizý úshin qoryqshylar olarǵa kómekke keldi. Esil aýdanyndaǵy «Krasnyı bor» janýarlar dúnıesin qorǵaý jáne ósimin molaıtý memlekettik mekemesi aýmaǵy 60 myń gektardan astam jerdi baqylaıdy. Bul qoryqta jabaıy janýarlardyń on shaqty túri mekendeıdi. Mekeme qyzmetkerleri ańdarǵa arnap arnaıy azyqtandyrý alańdaryn ázirlegen.
«Maraldyń ǵana sany bizdiń mekeme aýmaǵynda myńǵa jetti. Olar ashtan ólmeýi úshin osy kezde biz qoldan qorektendirýdi bastaımyz. Qalyń qardyń astynan azyq tabý ońaı emes. Ol úshin orman ishine 13 astaý qoıdyq, 5 azyqtandyratyn alańymyz bar», - deıdi mekemeniń aǵa qoryqshysy Vıktor Krotenko.
Qoryq aýmaǵynda jabaıy ańdardyń 10-ǵa jýyq túri meken etedi. Maraldardan basqa, elik, dońyz, buǵy, qoıan, túlki kezdesedi. Olarǵa qysqa qajetti jemazyq pen qaıyń sypyrǵyshtaryn orman mekemeleriniń qoryqshylary jaz boıy ázirleıdi. Budan basqa jem-shóp te kóptep daıyndalady.
«Qar jamylǵysy óte qalyń bolǵan kezde qosymsha azyq berý qajet. Janýarlardyń azyqqa emin-erkin jetýi úshin joldardy qardan arshımyz. Byltyr jazda 35 myń sypyrǵysh, jetkilikti mólsherde shóp pen tuz ázirledik», - deıdi SQO Tabıǵı resýrstar jáne tabıǵatty paıdalanýdy retteý basqarmasynyń bólim basshysy Erlan Táshimov.
Ádette ańdar qar ketkenshe deıin qoldan azyqtandyrylady eken.
