SQO-da qant zaýytynyń qurylysy toqtap tur
ASTANA. QazAqparat - Indýstrııalandyrý kartasyna engen joba byltyr júzege asýy tıis edi. Alaıda kásipker nesıe ala almaı, ilkimdi is orta jolda qaldy, dep habarlaıdy Habar 24 telearnasy.
Degenmen sharýashylyq qant qyzylshasyn egip, kóktemgi dala jumystaryna kirisip ketti. Tańat Beknazarov - qant qyzylshasyn 90-jyldary egip, astyq alǵan agronomdardyń biri. Sodan beri Soltústik Qazaqstan oblysynda tátti túbir sebilgen joq. Endi ony osy sharýashylyq qolǵa alyp, taǵy da tyńnan túren saldy.
«Byltyr birinshi ret egip kórdik. Jaqsy ónim aldyq. Bir gektardan 50 tonnaǵa deıin aldyq. Bıyl 400 gektar ektik, 8-9 suryp ákeldik», - deıdi bas agronom Tańat Beknazarov.
Qant qyzylshasyn jylda bir jerge egýge bolmaıdy. Bıyl sharýashylyq 400 gektardy tyńaıtyp, 30 mln teńge saldy. Endi tuqym sebýge kiristi. Sharýashylyq qant qyzylshasyn birinshi ret byltyr egip, 12 jarym myń tonna ónim jınady. Alaıda ony óńdeı almaı, Bashqurtstanǵa satyp jiberdi. Qazir qarjy qolbaılaý bolyp, qant zaýytynyń qurylysy toqtap tur. Indýstrııalandyrý kartasyna engen jobanyń quny - 4 mlrd teńge. Zaýyttyń qazyǵy qaǵylyp, qabyrǵasy qalandy. Endi qarjy qat. Sharýa nesıe alaıyn dese, kepilge qoıatyn múlki jetpeı tur.
«Birinshi jospar boıynsha biz 2016 jyly ashamyz dep úmittendik. Biraq byltyr da nesıe ala almadyq. Óz qarjymyzǵa salsaq, sozylyp keteıin dep tur. Qazir 2 bankke ótinish berdik», - deıdi seriktestik dırektorynyń orynbasary Baqyt Rashıtov.
Aıta keterligi, Qazaqstanda 4 qant zaýyty bar. Olar ońtústik oblystarda ornalasqan. «Sondyqtan joba júzege assa, Soltústik Qazaqstan qantpen tolyq qamtamasyz etiledi», - deıdi sharýa.
