SQO-da qańǵyrǵan mal úshin 4 myńǵa jýyq turǵyn ákimshilik jaýapkershilikke tartyldy
PETROPAVL. QazAqparat – Soltústik Qazaqstan oblysynda tártip saqshylary tórt túligin bos jiberip, baqpaıtyn aýyl turǵyndarymen kúresti kúsheıtti. Jyl basynan 247 adamǵa aıyppul salyndy, dep habarlaıdy QazAqparat tilshisi.
Ótken aptada kóptegen jergilikti pablıkterde Ǵ.Músirepov atyndaǵy aýdannyń turǵyny Chervonnoe-Novoıshımskoe jolynda 18 jylqynyń qaraýsyz júrgeni týraly vıdeo jarııalap, jylqylardyń avtokólik qozǵalysyna kedergi keltirip jatqanyn kórsetti.
SQO polıtsııa departamenti baspasóz qyzmetiniń málimetinshe, Ǵ.Músirepov atyndaǵy aýdannyń tártip saqshylary jylqylardyń ıesin anyqtady. Novoıshımka aýylynyń 1962 jyly týǵan turǵynyna malyn qaraýsyz jibergeni úshin ákimshilik hattama toltyryldy.
«2020 jylǵy 4 tamyzdaǵy oblystyq máslıhattyń sheshimimen bekitilgen jáne SQO Ádilet departamentinde tirkelgen aýyl sharýashylyǵy janýarlaryn jaıýdyń qaǵıdalaryna sáıkes jalpyǵa ortaq paıdalanylatyn jerlerde, temir jáne avtomobıl joldaryna bólingen beldeýlerde, sý qorǵaý beldeýleri men sanıtarııalyq qorǵaý aımaqtarynyń shekarasynda aýyl sharýashylyǵy janýarlaryn jaıýǵa bolmaıdy. Tamyzdan bastap bizdiń aýdanda maldaryn qańǵyrtyp jibergen 53 adam eskertilip, 18-ine aıyppul salyndy», - deıdi Ǵ.Músirepov atyndaǵy aýdannyń polıtsııa bólimi bastyǵy Marat Áljanov.
Polıtseılerdiń aıtýynsha, qaraýsyz júrgen mal urylarǵa ońaı olja jáne jol-kólik oqıǵalaryna sebepshi bolady. Jyl basynan oblysta ákimshilik jaýapkershilikke 3886 mal ıesi tartyldy, 247-ne aıyppul salyndy.
