SQO-da qańǵybastar arasynan qylmyskerler anyqtaldy
ASTANA. QazAqparat - Soltústik Qazaqstan oblysynda polıtsııa qyzmetkerleri turaqty mekenjaıy joq adamdardy tekserý barysynda Reseıde izdeýge jarııalanǵan qylmyskerdi ustady, dep habarlaıdy QazAqparat tilshisi SQO ІІD baspasóz qyzmetine silteme jasap.
Tártip saqshylary jertólelerdi, káriz lıýktaryn, bos qalǵan ǵımarattar men shatyrlardy qarap, úısizderdi teksergen. Tekseris jumystarynyń alǵashqy kúni quqyq qorǵaý bólimshelerine 133 úısiz adam jetkizilgen. Olardyń barlyǵynan saýsaq tańbalary alynyp, esepke tirkelgen.
«Turaqty mekeni joq adamdardyń arasynda qashyp júrgen úsh qylmysker ustaldy. Naqtyraq aıtqanda, Ýálıhan aýdanynda Reseıdiń Omby qalasynyń polıtseıleri kólik urlaǵany úshin izdep júrgen 26 jastaǵy jigit ustaldy. Qazir ol ýaqytsha oqshaýlaǵyshqa qamaldy. Jýyq arada ekstradıtsııalanady», - dep habarlady vedomstvonyń baspasóz qyzmetinen.
Іzdeýde júrgen taǵy bir adam urlyǵy úshin quqyq qorǵaýshylardan qashyp júrgen. Sondaı-aq úısizder arasynan buryn joǵalyp ketti degen 4 adamnyń anyqtalǵany belgili boldy.
