SQO-da qańǵyrǵan ıtter mal men qusty qyryp jatyr
PETROPAVL. KAZINFORM – Soltústik Qazaqstan oblysy Chapaev eldi mekeninde qańǵyrǵan ıtter bir úıdiń 12 qoıyn qyryp ketti. Aýyl turǵyndarynyń aıtýynsha, bul alǵashqy jaǵdaı emes, buǵan deıin de birneshe shańyraq mal-qusyn qamaýly turǵan jerden óli tapqan.
Qyzyljar aýdany Chapaev eldi mekeniniń turǵyny Raýsııa Týletaevanyń aıtýynsha, qańǵyrǵan ıtter onyń shashpada turǵan qoılaryna shapqan.
«11 qoıdy qyryp ketken, taǵy bireýin aram óltirmeı, kisi shaqyryp, soıyp aldyq. 5-6 qoıdy jaralap ketken. Keshe osy aýyldaǵy Ánas degen kisiniń eki qoıyn tamaqtap, ekeýin jaralady.
Ákimge de habarladym. Ýchaskelik polıtseı kelip, hattama toltyrdy. Veterınarlar kelip, jaralanǵan qoılardy kórdi. Ólgen maldy ıistenip, shybyn úımelep ketkendikten polıgonǵa aparǵyzyp tastadyq», - deıdi Raýsııa Týletaeva.
Aýyl turǵynynyń aıtýynsha, eldi mekende sońǵy kezde qańǵyrǵan ıtter kóbeıip ketken.
«Kelgen adamdar aıtyp jatyr. Qańǵyrǵan ıtterden zardap shekken jalǵyz biz emes, Janserik degenniń qustaryn, qoılaryn qyryp ketken. Aýyl ishinde ıesiz ıtter emin-erkin júredi. Mana on shaqtysyn kórdim, aǵashqa kirdi. Atýǵa bolmaıdy deıdi. Malymyzdy qyryp jatyr, qanshama shyǵyn shektik. Joldasymnyń júregine ota jasaǵan, múgedektigi bar, ózim de zeınetkermin, kún kórip otyrǵan malymyz edi», - deıdi Raýsııa Týletaeva.
Qyzyljar aýdanynda buralqy ıtterdiń kóbeıýinen basqa aýyl turǵyndary da zardap shegip jatyr. SQO Veterınarııa basqarmasynyń málimetinshe, shilde aıynda Qyzyljar aýdany Báıterek aýylynda Abdýjalop Mansýrovtyń 9 qoıyn ıtter qyryp ketken.
«2023 jylǵy 1 qyrkúıekten bastap Qazaqstanda úı janýarlaryn mindetti esepke alý engizildi, biraq, ókinishke oraı, úı janýarlarynyń ıeleri «janýarlarǵa jaýapkershilikpen qaraý týraly» zańdy buza otyryp, úı janýarlaryn chıpteýden bas tartady, osyǵan baılanysty ıttiń ıesin tabý máselesi týyndaıdy.
Sonymen qatar, ýaqytsha ustaý pýnktteriniń bolmaýyna baılanysty qańǵyrǵan ıtterdi aýlaý múmkin emes.
Búgingi kúni Qyzyljar aýdanynyń ákimdigi ýaqytsha ustaý pýnktin salý úshin jer ýchaskesin bóldi, jobalyq-smetalyq qujattary ázirlenip jatyr. Memlekettik saraptamadan ótkennen keıin qurylysqa qarajat bólý máselesi qaralatyn bolady», - deıdi SQO veterınarııa basqarmasynyń mamandary.
Buǵan deıin SQO-da bıyl ıt-mysyq ıelerine 5,3 mln teńge aıyppul salynǵanyn jazǵan edik.
