SQO-da qańǵybas ıt-mysyqtar máselesi qalaı rettelip jatyr

ASTANA. KAZINFORM – Soltústik Qazaqstan oblysynda mamandar 450 qańǵybas janýardy aýlap, chıptep, vaktsınalap, sterıldep, mekendeý ortasyna qaıtardy. Bul týraly oblys ákimi Ǵaýez Nurmuhambetov aıtyp berdi.

 — Búginde respýblıka boıynsha qańǵybas janýarlardy retteýge qatysty zań kúshine endi jáne sterıldeý mehanızmi júrip jatyr. Jalpy, bizdiń oblysta jáne el boıynsha bul baǵytta veterınarlyq qyzmetter birinshi kezekte qańǵybas janýarlardy aýlaýmen aınalysady, ekinshi — chıpteý, úshinshi — vaktsınalaý, tórtinshi — sterıldeý júrgiziledi», — dep túsindirdi oblys ákimi Ortalyq kommýnıkatsııalar qyzmetinde ótken brıfıngte.

Osy protsedýralardan keıin janýarlar qaıtadan óz ortasyna jiberiledi.

 — Biz shamamen 450 qańǵybas janýardy ustap, chıptep, vaktsınalap, sterıldep, mekendeý ortasyna qaıtardyq. Oǵan qosa, qazir jobalyq-smetalyq qujattama ázirlendi. Oblys ortalyǵynda «Isaev» jeke kásipkerligi basqaratyn bir qabyldaý pýnkti bar, onyń jaǵdaıy óte jaqsy, 500 ıt pen 300 mysyqty qabyldaı alady. Qyzyljar aýdanynda da osyndaı panalaý orny bar. Oǵan qosymsha, vedomstvo esebinen oblys ortalyǵynda taǵy bir panalaý ornyn qurý úshin JSQ jasaldy. Bizdiń oblystyń 8 aýdanynda osyndaı panalaý oryndary jumys isteıdi, — dedi Ǵ. Nurmuhambetov.