SQO-da qandaı mamandarǵa suranys joǵary
PETROPAVL. KAZINFORM – Soltústik Qazaqstan oblysynda 5,5 myńnan astam jumyssyz retinde esepke alynǵan. Soǵan qaramastan, búgingi kúni 2149 jumys orny bos tur.
SQO Eńbek utqyrlyǵy ortalyǵynyń málimetinshe, ótken jyldyń 1 shildesinen bastap 7 666 adam sýbsıdııalanatyn jumys oryndaryna jiberilgen. Onyń ishinde áleýmettik jumys oryndary, «Jastar tájirıbesi», «Birinshi jumys orny», «Urpaqtar kelisimsharty», «Kúmis jas» jobalary bar. Tek qoǵamdyq jumystarǵa ǵana 5 329 adam tartylǵan.
«Máselen, qazir jastar oqý ornyn bitirip, qoldaryna dıplom alyp jatyr. Ózdiginen jumys taba almaǵan jaǵdaıda olarǵa kómektese alamyz.
«Jastar praktıkasyna» oqý aıaqtaǵanyna 5 jyldan aspaǵan, jumyssyz retinde tirkelgen, 35 jastan aspaǵan qyz-jigitter jiberiledi.
«Jastar praktıkasynyń» uzaqtyǵy 12 aıdan aspaıdy, aılyq eńbekaqysy keminde 30 aılyq eseptik kórsetkishti – 110 myń teńgeni quraıdy. Bul baǵdarlama boıynsha jumysqa ornalasý úshin birinshiden, bilimi týraly dıplom bolýy qajet, jumyssyz retinde tirkelý úshin Mansap ortalyǵyna júginip nemese Enbek.kz portalynda tirkeýden ótý kerek. Osydan keıin bos oryndarǵa joldama beriledi», - deıdi SQO Eńbek utqyrlyǵy ortalyǵynyń basshysy Aman Tóregeldın.
Qazirgi ýaqyttaSQO boıynsha 2149 bos jumys orny bar.
«Bir kezderi eńbek naryǵynda qarjygerler, ekonomıster, zańgerler kóbeıip ketip, olarǵa suranys azaısa, qazir kerisinshe, osy mamandar jetispeıdi. Sondaı-aq óńirde is júrgizýshilerdiń, kólik júrgizýshilerdiń, ınjenerlerdiń orny bos, jumysshylarǵa da suranys joǵary», - deıdi Aman Tóregeldın.
Bıyl SQO boıynsha 5524 adam jumyssyz retinde tirkelgen. Onyń ishinde 1204 adam jumysynan aıyrylǵandyǵy boıynsha járdemaqy alady. Jalpy óńirdegi jumyssyzdardyń ortasha jasy – 45-te.
Buǵan deıin SQO-da egin egý naýqany aıaqtalǵanyn jazǵan edik.
