SQO-da qandastar irgesin qalaǵan erekshe aýyl bar — fotoreportaj
PETROPAVL. KAZINFORM — Soltústik Qazaqstan oblysynda halyq sany artqandyqtan mektebi tarlyq ete bastaǵan aýyldar da bar. Sonyń biri — Báıterek eldi mekeni.
Bul aýyl Báıterek atyna saı ósip-órkendep keledi. Kúre joldyń boıynda ornalasqan ári oblys ortalyǵy da tıip tur.
Tabıǵaty da kórkem, erke Esildiń jaǵasynda ornalasqan. Qazir aýylda, orta mektep, polıtsııa pýnkti, ákimdik, meshit pen dárigerlik ambýlatorııa jumys istep tur. Birneshe dúken, dámhana bar.
Aýyldyń taǵy bir ereksheligi — halqy. Aýyl ákimi Nursultan Hýatovtyń aıtýynsha, munda Ózbekstan, Qytaı, Mońǵolııa, Reseı, Ýkraına sııaqty elderden kóshken qandastar jáne elimizdiń ońtústigi men batysynan qonys aýdarǵan otbasylar turyp jatyr.
Úsh jyl buryn 400-den asa shańyraq bolsa, qazir sany 550-den asady.
— Aýylda 3224 turǵynymyz bar. Onyń 500-den astamy zeınetker jáne 600-deıi — oqýshy. Halyqtyń 85% — qazaqtar. Eldi meken damyp keledi. Turǵyndar eńbekqor, jeke kásipkerlik ashqandar kóp. Qalada, kórshi aýyldaǵy kásiporyndarda qatynap jumys isteıdi. Ózimizde de quramajem zaýyty salynyp jatyr. Kelesi jyly jańadan 50 shaqty jumys orny qurylmaq, — deıdi Nursultan Hýatov.
Eńbekqor jandarǵa soltústiktiń qara sýyǵy túk emes. Úı mańyndaǵy jylyjaı endi sáýir aıyna deıin jumys istep, óńir turǵyndaryn qysta qat kók jýamen qamtamasyz etpek.
Jarqynaı Qoshbaeva ósimdikterdi sýaryp, jylyjaıdaǵy temperatýranyń qalypty turýyn qadaǵalaıdy. Otbasylyq bızneste árqaısynyń óz mindeti bar.
Máselen inisi Nurjan daıyn ónimdi Petropavldaǵy bazarlardyń birinde satady. Bıyl Qoshbaevtar áýletiniń atamekenge oralǵanyna — 15 jyl.
— Jazda kókónistiń onshaqty túrin egemiz. Qysta tek pııazben ǵana aınalysamyz. Kelgenimizge nalymaımyz. Eńbektenseń bolady, eńbektenip, kúnimizdi kórip jatyrmyz. Ózbekstanda da kókónis ektik. Kelgen kezde pesh jaǵa almaı qınalǵanymyz bar, qazir bárine úırendik, — deıdi Jarqynaı Qoshbaeva.
Qaldyqyz Safarbaeva da — Ózbekstannyń týmasy. Buǵan deıin jylyjaıda jumys istegen ol bıyl 200 bas qaz alyp, jaz boıy kútip-baqty.
Endi aqyryndap ónimdi ótkizip, jemisin kórip jatyr. Jańa qonysqa úırengenimen, alystaǵy aǵaıynyn saǵynady.
— Qaı istiń bolmasyn óz qıyndyǵy bolady ǵoı. Balapan kezinen asyraısyń bulardy, shóp tabýyń kerek, satyp alasyń, dárýmender qajet. Kúni boıy baǵý kerek, — deıdi Qaldyqyz Safarbaeva.
Bastapqyda aýyl balalary aýdan ortalyǵyna avtobýspen qatynap oqydy.
2016 jyly Báıterekte 350 orynǵa shaqtalǵan jańa mektep qoldanysqa berildi. Qazir bul ǵımaratta 90 balaǵa arnalǵan shaǵyn ortalyq ta jumys istep tur.
— Bizdiń mektep basqalarynan erekshelenip turady. Sebebi ártúrli ulttardyń úrdisi, mádenıeti bolsyn, tili, ádet-ǵurpy bolsyn sol bizge jaqynyraq tanys. Sebebi shette týyp ósken qazaq baýyrlarymyzdan sony baıqap, kóremiz, — deıdi mektep dırektory Shamshýhan Shaımerdenov.
Orta mektepte sabaq eki aýysymda ótedi. Bala kóp, ári ǵımarattaǵy jeti kabınet shaǵyn ortalyqqa berilgen.
— 2012 jyly otbasymmen Ózbekstannan «Nurly kósh» baǵdarlamasy arqyly qonys aýdardym. Úı berdi, mektepke jumysqa aldy. Odan basqa ózbek etno-mádenı ortalyǵymyz bar «Dýstlık» degen. Sonyń tóraǵasymyn. Óıtkeni Ózbekstannan kelgen otbasylar kóp, qazir mektepte 360 bala bolsa, sonyń shamamen 60% Ózbekstannan kelgen. Buryn mektepte arnaıy kabınetimiz bolatyn, qazir kabınet jetpeı jabylyp qaldy, — deıdi Baıan Qaldybekova.
Aýylda mádenıet úıi de joq. Qazir eldi mekende oblystyq qazyna esebine eki páterli jeti úıdiń qurylysy júrip jatyr.
Jańa baspananyń aldy kópbalaly otbasylarǵa berile bastaǵan. Halyq sany kóbeıip keledi.
Esterińizge salaıyq, buǵan deıin elimizde aýyldardyń sany bir jylda 149-ǵa azaıǵanyn jazǵan edik.
