SQO-da qamys órtenip, aıyp turaǵyndaǵy 6 kólik janyp ketti
«Órt qaýpi kezeńi bastalǵannan beri 42 orman órti tirkeldi. Órtengen aýmaqtyń jalpy kólemi 668 gektardy qurady, eldi mekenderdegi qurǵaq shóp órti turǵyn úı alaptaryna da jaıyldy, bul jaǵdaı erekshe alańdaýshylyq týdyryp otyr. 12 sáýir kúni Petropavl qalasynyń mańynda qurǵaq shóp janyp, saldarynan 200-den astam saıajaı qurylysyna zaqym keldi. Órt sóndirýshilerdiń jedel áreketiniń arqasynda ǵana qaıǵyly jaǵdaı bolǵan joq. Al 14 sáýirde Soltústik Qazaqstan oblysynda qamys órtenip, aıyp turaǵyndaǵy 6 avtokólik janyp ketti, taǵy 4 kólikke zaqym kelgen», - dedi Nurbolat Derbisov Ortalyq kommýnıkatsııalar qyzmetinde ótken baspasóz máslıhatynda.
Sonymen birge, 15 sáýirde Pavlodar oblysynda saıajaı aýmaǵynda órt saldarynan bir adam qaza tapty, 300-den astam saıajaı ýchaskesi zaqymdaldy. Nurbolat Derbisovtyń aıtýynsha, dala ormany jáne órtteriniń kóp bóligi 100 km radıýsta TJ bólimsheleri joq shalǵaı aýmaqtarda týyndaıdy.
«2021 jyly eriktiler memlekettik órtke qarsy qyzmettiń kúsh-quraldarynsyz dala órtteriniń 25%-yn óz betinshe toqtatqan. Sonymen qatar, Batys Qazaqstan, Aqtóbe, Aqmola oblystarynda erikti qurylymdar barlyq tabıǵı órtterdiń jartysynan kóbin sóndirdi», - deıdi N. Derbisov.
