SQO-da qalyń qarda balyq aýlaýǵa shyqqan 6 adamǵa qutqarýshylardyń kómegi qajet boldy

PETROPAVL. KAZINFORM – Soltústik Qazaqstan oblysynda balyq aýlaýǵa barǵan shyqqan adamdarǵa qutqarýshylardyń kómegi qajet boldy.

SQO Tótenshe jaǵdaılar departamenti baspasóz qyzmetiniń málimetinshe, Shal aqyn aýdanynyń qutqarýshylary arnaıy «TREKOL» tehnıkasymen oqıǵa ornyna jedel jetip, qutqarý operatsııasyn sátti júrgizdi. «Nıva», «VAZ» jáne «Aýdı» kóligin mingen 6 balyqshy qarǵa keptelip, ózdiginen shyǵa almaǵan.

- Sergeev sý qoımasyna balyq aýlaýǵa barǵan edik. Qarǵa battyq. Ózimiz shyqpaq bolyp edik, nátıje bolmady. Kómek der kezinde jetip, aman-esen alyp shyqty, - deıdi balyqshylar.

Qutqarylǵandardyń eshqaısysyna medıtsınalyq kómek qajet bolmady.

Buǵan deıin SQO-da kóktemgi sý tasqyny qarsańynda ózenderde muz jarý jumysy bastalǵanyn jazǵan edik. Jalpy, oblystyń 7 aýdanynda 50-den astam ýchaskede jarylys jumystary josparlanǵan.