SQO-da kadr jetispeýshiligi qaı salada basym
PETROPAVL. KAZINFORM — Soltústik Qazaqstan oblysynda jumys berýshiler arasynda saýalnama júrgizilip, eńbek naryǵynda mamandarǵa degen qajettilik aıqyndaldy.
Saýalnamany SQO Kásipkerler palatasy júrgizdi. Ol aldaǵy úsh jylǵa bilikti kadrlarǵa degen qajettilikti boljaýǵa baǵyttalǵan. Memlekettik bilim berý tapsyrysy da osy saýalnama negizinde qalyptastyrylady. Bıyl zertteýge 1182 jumys berýshi qatysty, olardyń 607-si jeke kásipker jáne 575-i zańdy tulǵa. Nátıjesinde oblysqa 3043 mamannyń qajettigi anyqtaldy.
Kásipkerler palatasynyń dırektory Esjan Orazalınniń aıtýynsha, Petropavlda kadr tapshylyǵy ásirese ózekti. Oblys ortalyǵynyń jumys berýshileri saýalnama barysynda 1886 mamanǵa muqtaj ekenin kórsetken. Bul óńir boıynsha jalpy suranystyń 62%. Sonymen qatar, M. Jumabaev aýdanyna — 254 adam, Qyzyljar aýdanyna — 196, Esil aýdanyna — 157 jáne Tımırıazev aýdanyna 127 kadr kerek.
Úshinshi jyl qatarynan aýyl sharýashylyǵy men óńdeý ónerkásibi salasynda suranys joǵary. Bıyl aýyl sharýashylyǵynda 600 mamannyń orny bos tur, bul jalpy suranystyń 20%. Óńdeý ónerkásibine 465 bilikti kadr kerek.
— Kadrlarǵa turaqty joǵary suranys bar taǵy bir sala — bilim berý. Bul sektorǵa 487 maman qajet, bul — barlyq qajettiliktiń 16% jáne ol ótken jylǵy kórsetkishpen shamalas. Memlekettik basqarý jáne saýda salalarynda da mamanǵa suranys joǵary — árqaısysynda shamamen 350 jumys orny bar. Al ǵylym, mádenıet jáne ákimshilik qyzmet salalarynda kadr qajettiligi eń tómengi deńgeıde, — deıdi SQO Kásipkerler palatasy adamı kapıtaldy damytý bóliminiń basshysy Irına Toropova.
Saýalnama nátıjesine súıene otyryp, kásipkerler palatasynyń mamandary suranysqa ıe top-10 mamandyqtyń tizimin jasady. Bıyl bul tizimdi tiginshiler bastap tur, óńirge 312 tiginshi kerek. Odan keıingi orynda órt sóndirý ınspektorlar keledi, 200 maman qajet, 178 logoped, 142 traktorshy-mashınıst jáne 92 aspazǵa suranys bar. Sondaı-aq, 87 ınjener-mehanızatordyń orny bos, 75 orman sheberi — ıaǵnı, ýchaskelik memlekettik orman ınspektorlary, 65 mektepke psıholog, 61 dene shynyqtyrý pániniń muǵalimi kerek. 54 bos jumys ornymen avtoslesarlar da suranysqa ıe mamandyqtar qataryna endi.
— Órt sóndirý ınspektory men logoped mamandyqtary alǵash ret eń suranysqa ıe úshtikke endi. Bilim deńgeıine keler bolsaq, kásibı-tehnıkalyq bilim alǵan 1751 adam jáne 715 joǵary bilimdi maman qajet. Jumys berýshiler orta bilimdi 198 adamdy, qysqa merzimdi kýrstardan ótkender 135 adamdy jumysqa alýǵa daıyn. Al 249 jaǵdaıda alǵan bilimi mańyzdy emes, — deıdi Irına Toropova.
Buǵan deıin SQO-da qyryqtan astam sý aıdynyn sanıtar dárigerler baqylaýǵa alǵanyn jazǵan edik.