SQO-da K-700 aýdarylyp traktorıst kóz jumdy
PETROPAVL. QazAqparat – Soltústik Qazaqstan oblysyndaǵy sharýashylyqtardyń birinde K-700 traktory aýdarylyp, saldarynan jumysshy mert boldy, dep habarlaıdy QazAqparat tilshisi.
SQO Polıtsııa departamenti baspasóz qyzmetiniń málimetinshe, oqys oqıǵa Taıynsha aýdany Qaraǵash aýylynda bolǵan. Polıtsııa bólimshesine habar saǵat 17.00 shamasynda túsedi. Eldimeken syrtyndaǵy JShS-nyń shóp qorasynyń aýmaǵynda K-700 traktorynyń júrgizýshisi kólikti abaısyzda aýdaryp alǵan.
Oqıǵa ornyna birden jedel tergeý tobynyń mamandary attanyp, istiń mán-jaıyn anyqtady.
«Mehanızator traktorymen súrlem shóp shuńqyrynyń qasynda jumys istep jatyp, abaısyzda ony aýdaryp alǵan. Aýdarylǵan aýyr tehnıka kabınasyn japyryp tastaǵan. Kabınadan shyǵarý kezinde 43 jastaǵy júrgizýshi kóz jumdy», - deıdi polıtseıler.
Bul derek Sotqa deıingi tergep-tekserýdiń biryńǵaı tizilimine «Eńbek qorǵaý erejeleriniń buzylýy» baby boıynsha engizildi. Birqatar tıisti saraptamalar júrgizilmek.
