SQO-da izdeý salynǵan er adamnyń máıiti kólden tabyldy
PETROPAVL. QazAqparat – Soltústik Qazaqstan oblysynda izdeý jarııalanǵan 64 jastaǵy er adamnyń denesi kólden tabyldy, dep habarlaıdy QazAqparat tilshisi.
SQO Tótenshe jaǵdaılar departamentiniń málimetinshe, 27 shilde kúni saǵat tańǵy 6.00 shamasynda 1958 jyly týǵan er adamnyń iz-túzsiz joǵalǵandyǵy týraly habar túsken. Qutqarýshylar Petropavl turǵynynyń denesin qala mańyndaǵy Pestroe kólinen alyp shyqty. Er adam sol túni spırttik ishimdik ishken eken.
«Shildeniń 27-i tańǵy saǵat 10.15-te jedel qutqarý jasaǵynyń kúshimen Pestroe kólinen 1958 jyly týǵan er adamnyń denesi shyǵaryldy. Aldyn-ala boljam boıynsha, Petropavl turǵyny sol túni saǵat 2.00-3.00 shamasynda joldastarymen kóldiń jaǵasynda spırttik ishimdik ishken. Qazir onyń sýǵa qalaı ketkeni anyqtalyp jatyr», - deıdi SQO TJD basqarma bastyǵynyń mindetin atqarýshy Asqar Ismaǵulov.
Jalpy óńirde sýǵa shomylý maýsymy bastalǵaly 4 adamnyń ajaly sýdan boldy, sonyń bireýi – bala. Mamandardyń aıtýynsha, kóp jaǵdaıda qaıǵyly oqıǵalar arnaıy jaraqtandyrylmaǵan kólderge sýǵa shomylý kezinde bolǵan. Máselen, sońǵy 10 jylda tyıym salynǵan jerlerde sýǵa túsken 214 adam, sonyń ishinde 34 bala kóz jumǵan.
Qazirgi ýaqytta SQO-da 2 myńnan astam kól, ondaǵan ózen bolsa, solarda tek 58 ǵana sýǵa shomylýǵa arnaıy oryn ázirlengen.
