SQO-da ıt pen mysyqty serýendetý erejesin buzǵandarǵa 500 myń teńge aıyppul salyndy
PETROPAVL. QazAqparat – Soltústik Qazaqstan oblysynda bıyl ıt pen mysyq asyraý jáne serýendetý qaǵıdalaryn buzǵany úshin 76 turǵyn ákimshilik jaýapkershilikke tartyldy, dep habarlaıdy QazAqparat tilshisi.
SQO Polıtsııa departamenti baspasóz qyzmetiniń málimetinshe, Petropavl qalasynda Mádenıet jáne demalys saıabaǵynda ıtterdi serýendetýge alań bólingen. Sondaı-aq, kóp qabatty úılerdiń turǵyndary jalpy jınalystarda úıdiń aınalasynan ıt pen mysyqty serýendetýge arnaıy oryn bólýge quqyly.
«Soltústik Qazaqstan oblysy máslıhatynyń 2015 jylǵy 21 qańtardaǵy sheshimimen ıt pen mysyqty asyraý jáne serýendetý erejesi bekitildi. Osy erejege sáıkes úı janýarlaryn aýlalarda, balalar alańdarynda, mektepke deıingi mekemelerdiń telimderinde, mektep alańdarynda, emdeý-profılaktıkalyq jáne medıtsınalyq densaýlyq saqtaý mekemeleriniń aýmaqtarynda, stadıondarda, saıabaqtarda, skverlerde serýendetýge bolmaıdy.
Eger de janýarlar kireberisterde, baspaldaq alańdarynda, sporttyq, balalar alańdarynda, gazondarda, trotýarlarda, saıabaq jáne skverler aýmaqtarynda ekskrementterin qaldyrsa, ony ıeleri dereý jınaý qajettigin esten shyǵarmaǵan jón. Itterdiń dekoratıvti túrlerinen basqalaryn tumyldyryqpen serýendetý qajet», - deıdi Jergilikti polıtsııa qyzmeti basqarmasynyń aǵa ınspektory Aleksandr Rozbah.
QR Ákimshilik quqyq buzýshylyq týraly kodeksiniń 408-babyna sáıkes ıt pen mysyqty asyraý jáne serýendetý qaǵıdalaryn buzǵandarǵa úsh aılyq eseptik kórsetkish mólsherinde aıyppul salynady. Bul - 7 myń teńge shamasynda.
Jalpy jyl basynan osyndaı quqyq buzýshylyq úshin soltústikqazaqstandyqtar 500 myńnan asa teńge aıyppul tóledi.
