SQO-da ıt-mysyqtan zardap shekkender sany artqan
PETROPAVL. KAZINFORM – Soltústik Qazaqstan oblysynda qutyrma tirkelmegenimen, janýarlardan zardap shekkender sany kúrt ósti.
SQO Sanıtarııalyq-epıdemıologııalyq baqylaý departamentiniń málimetinshe, osy jyldyń birinshi toqsanynda oblysta antırabbııalyq kómekke janýarlar qapqan, tyrnaǵan, tistegen 385 adam júgindi. Bul ótken jyldyń sáıkes kezeńimen salystyrǵanda 67% artyq. Byltyr osy ýaqytta 231 adam dáriger kómegine júgingen edi.
Mamandardyń aıtýynsha, mundaı jaǵdaı Petropavlda ǵana emes, oblystyń barlyq aýdandarynda baıqalady. Janýarlar qaýyp, tistegen adamdar sany óńir boıynsha kóbeıgen.
Olardyń ishinde 214 adamdy, ıaǵnı zardap shekkenderdiń 55% ıt qapqan. 39 adamdy mysyq talaǵan, al qalǵandary kemirgishterden – egeýquıryq, tyshqan, tıinnen zııan kórgen. Zardap shekkenderdiń barlyǵyna qutyrmaǵa qarsy ekpe qoıyldy.
- Eger adamdy ózine tıesili nemese belgili janýar tistese, ol mindetti túrde veterınarlyq baqylaýǵa alynady. 10 kún ishinde qutyrma belgileri baıqalmasa, veterınar tıisti anyqtama berip, ekpe kýrsy toqtatylady. Mundaı jaǵdaıda adamǵa tek úsh ekpe jasalady: alǵashqy kúni jáne 3–7 kúnderi. Al janýar kúmándi nemese belgisiz bolsa, vaktsınatsııa tolyq kýrs boıynsha — 14 jáne 30-shy kúnderi de jalǵasady, - deıdi departament basshysynyń orynbasary Arman Kúshbasov.
Mamandar janýar ıelerine jaýapkershilikti kúsheıtýdi eskertedi. Itterdi baılaýda nemese arnaıy qorshaýda ustaý qajet. Kóshege shyǵarǵanda qarǵybaý taǵyp, tumyldyryq kıgizý mindetti. Sonymen qatar, úı janýarlaryna qutyrmaǵa qarsy ekpe ýaqytyly salynýy tıis.
Dárigerler kez kelgen janýar qaýyp, tyrnaǵan jaǵdaıda oǵan beıjaı qaramaýǵa shaqyrady. Alǵashqy saǵattarda egilgen ekpe qaýipti derttiń aldyn alady.
Buǵan deıin Batys Qazaqstanda 800-den astam iri qara brýtsellez aýrýyna shaldyqqanyn jazǵan edik.
