SQO-da «Іskerlik baılanystar» jobasy aıasynda kásipkerler sertıfıkat aldy
PETROPAVL. QazAqparat – Petropavlda «Bıznestiń jol kartasy - 2020» baǵdarlamasynyń aıasynda «Іskerlik baılanystar» atty joba júzege asyrylyp, oqý kýrstarynan ótken kásipkerler sertıfıkat aldy, dep habarlaıdy QazAqparat tilshisi.
Kásipkerler palatasy baspasóz qyzmetiniń habarlaýynsha, oqý kýrsyna qatysýshylardyń endi Germanııada taǵylymdamadan ótýge múmkindikteri bar. Biliktilikti arttyrý kýrsy 3 aptaǵa sozyldy. Alǵashqy on kúnde-aq kásipkerler bes bıznes-jattyqtyrýshymen jumys istedi. Irına Fenske Germanııadan arnaıy kelse, qalǵandary: Aınur Qalmaǵanbetova, Ásel Jumaseıitova, Arman Aqberdıev jáne Baný Bek-Bolat – qazaqstandyq oqytýshylar. Olardyń árqaısy bıznesti tıimdi júrgizýdiń qyr-syrymen bólisti.
«Іskerlik baılanystar» baǵdarlamasy boıynsha biliktilikterin arttyrǵan shaǵyn jáne orta bıznes ókilderine sertıfıkattar tapsyryp jatyrmyz. Bul joba «Jol kartasy 2020>» bıznesti damytý jáne qoldaý memlekettik baǵdarlamasy aıasynda QR Ulttyq ekonomıka mınıstrligi men «Atameken» kásipkerler palatasynyń uıymdastyrýymen qolǵa alyndy», - deıdi SQO Kásipkerler palatasy dırektorynyń orynbasary Marat sqaqov.
«Alenýshka» tigin salony» JShS-niń dırektory Elena Mışenko jobaǵa qatysýshylardyń biri. Kásiporyn túrli memlekettik satyp alýlarǵa qatysyp, mektep formasyn tigedi, sportshylardyń jáne «Kırov atyndaǵy zaýyttyń» tapsyrysyn oryndaıdy.
«Bıyl «Іskerlik baılanystar» jobasyna qatysýdy sheshtim. Nátıjesinde óz kásibimdi ári qaraı damytýǵa múmkindik beretin kóptegen jańa joldarmen tanystym. Oqýdan keıin kásiporyn jumysyn saralap, shyǵyn kólemin azaıtyp, nátıjelilikti arttyrdym. Oqýdyń eshqashan artyqtyǵy bolmaıdy», - deıdi Elena Mışenko.
«Іskerlik baılanystar» jobasynyń ekinshi kezeńine ótkender bir aıǵa Germanııaǵa attanady. Oǵan eń belsendi, isi órge basqan, bıznes jospary bar kásipkerler tańdalyp alynbaq. Bıznes-taǵylymdama da qatysýshylarǵa tegin uıymdastyrylady.
