SQO-da Іshki ister mınıstri aýlalar men alańdarda jaıaý patrýldeýdi kúsheıtýdi tapsyrdy
SQO polıtsııa departamenti baspasóz qyzmetiniń málimetinshe, Іshki ister mınıstri Erlan Turǵymbaev pen Bas prokýror Ǵızat Nurdáýletov oblys prokýratýrasynda bolyp, vedomstvoaralyq yntymaqtastyq máselelerin talqylady. Taraptar jańa jaǵdaıda tıimdi jumys isteý úshin birinshi kezekte tehnıkalyq jabdyqtaýdy jetildirý jáne zamanaýı tsıfrlyq resýrstardy engizý qajet ekenin aıtty.
Sondaı-aq, Erlan Turǵymbaev polıtsııany reformalaýdaǵy negizgi prıntsıpterdi iske asyrý jónindegi Memleket basshysynyń bergen tapsyrmalarynyń oryndalýymen tanysty. «Jurtqa jaqyn polıtsııa» qaǵıdatyn damytýdyń mańyzdy faktory - krımınogendi dep sanalatyn jáne adam kóp júretin ýchaskelerge modýl úlgisindegi statsıonarlyq beketter ornatý. Petropavlda halyq kóp shoǵyrlanǵan, sonyń ishinde saýda-kóńil kóterý ortalyqtaryna jaqyn jerde osyndaı eki modýl jumys isteıdi. Qala turǵyndary bul jerge keńes alý úshin de, ákimshilik quqyq buzýshylyqtar boıynsha da júginedi. Erlan Turǵymbaev SQO-da osyndaı taǵy 4 beket ornatý qajettigin atap ótti.
Іshki ister mınıstri aýlalar men alańdarda jaıaý patrýldeýdi kúsheıtýdi tapsyrdy. Ol úshin polıtsııanyń kóshelerde qyzmet atqarý tártibi qaıta qaralmaq.
Óńirge sapary barysynda elimizdiń bas polıtseıi Jedel basqarý ortalyǵynda, Kınologııalyq qyzmet ortalyǵynda jáne kavalerııa bólimshesinde boldy.
Erlan Turǵymbaev azamattardyń jeke qabyldaýdy ótkizdi. Soltústikqazaqstandyqtar qoǵamdyq qaýipsizdik máseleleri boıynsha ǵana júginip qoımaı, alǵystaryn da bildirdi.
Іshki ister mınıstri jeke qurammen kezdesti. Ol SQO - Reseı Federatsııasynyń Qorǵan, Túmen jáne Omby sııaqty úsh oblysymen shektesetin óńir ekendigin atap ótti. Bul barlyq polıtsııa jumysyna belgili bir jaýapkershilik artady. Mınıstr zańsyz kóshi-qonmen, ınternet-alaıaqtyqpen, mal urlyǵymen, sıntetıkalyq esirtkilerdi taratýmen baılanysty qylmysty udaıy baqylaýda ustaýdy tapsyrdy. Olar transshekaralyq sıpatqa ıe jáne bul qylmystarmen tıimdi kúresý úshin sheteldik áriptestermen tyǵyz is-áreket jasasý qajet.
