SQO-da ishek ınfektsııasyn juqtyrǵandar sany artqan
PETROPAVL. QazAqparat - Soltústik Qazaqstan oblysynda 4 aıda ótkir ishek ınfektsııalarynyń 258 jaǵdaıy tirkelgen, dep habarlaıdy QazAqparat tilshisi.
Qoǵamdyq densaýlyq saqtaý bóliminiń bas mamany Kúlpash Talasbaevanyń aıtýynsha, syrqatty juqtyrý kórsetkishi byltyrǵydan 43% kóp. Onyń aıtýynsha, aýrýdyń artýy rotavırýstyq ınfektsııanyń 2 ese ósýimen baılanysty. Bul aýrý qys pen kóktemde órshıdi.
«Ótkir ishek ınfektsııasy - asqazan-ishek joldaryn zaqymdaıtyn juqpaly aýrýlar toby. Ereje boıynsha, syrqattanǵan adamda suıyq nájis bólinip, ishi aýyrady, júregi aınıdy, qusqysy kelip, dene qyzýy kóteriledi. Ótkir ishek ınfektsııasy bakterııalar men vırýstardyń saldarynan paıda bolady», - dedi K.Talasbaeva.
Ol jyl saıyn ótkir ishek aýrýyna balalardyń 80%-i shaldyǵatynyn aıtty. Kóbine 1-7 jas aralyǵyndaǵy balalar aýyrady.
Sanıtarlyq dárigerlerdiń aıtýynsha, ınkýbatsııalyq kezeń birneshe saǵattan 2-7 táýlikke deıin jalǵasýy múmkin. Aýrýdyń belgileri paıda bolǵanda dárigerge qaralý kerek.
Aýrýdan keıin ımmýnıtet álsirep, ınfektsııalardy qaıta juqtyrý qaýpi bar. Jeke gıgıena erejelerin saqtaný qajet.
