SQO-da iri kólemde astyq urlaǵandardyń isi qaralyp jatyr
PETROPAVL. QazAqparat - Іri kólemde astyq urlady degen kúdikpen, Soltústik Qazaqstan oblysyndaǵy «Azyq-túlik korporatsııasy» AQ fılıaly dırektorynyń ústinen qozǵalǵan qylmystyq is sotqa jiberildi, dep habarlaıdy «QazAqparat» HAA tilshisi.
«Saqtalyp turǵan bıdaıdy satty degen kúdikpen ustalǵan «Azyq-túlik korporatsııasy» AQ fılıaly men taǵy bir JShS dırektoryna qatysty sotqa deıingi tergeý jumystary aıaqtaldy. Olar jasaǵan qylmystan memleket 400 mln teńge zardap shegip otyr»,-dedi tergeý basqarmasynyń jetekshisi Asylbek Ydyrysov seısenbide ótken brıfıngte.
Tergeý nátıjeleri kórsetkendeı, kúdiktiler 9 myń tonna bıdaı urlaǵan.
A. Ydrysov barlyq shyǵynnyń orny toltyrylǵanyn aıtty. Sotqa deıingi tergeý aıaqtalyp, qazir qylmystyq isti sot qarap jatyr. Kúdiktiler qamaýda otyr.
Óńirdegi Sybaılas jemqorlyqqa qarsy ulttyq bıýro departamenti basshysynyń orynbasary Danııar Músilimov, atalǵan qylmys vedomstvo basshylyǵynyń qatań nazarynda ekendigin jetkizdi
«SQO - astyqty óńir. Sondyqtan bul fakt mańyzdy másele retinde qarastyrylady. Qylmystyq is shilde aıynan bastap qaralyp keledi. Jyldyń sońyna, keler jyldyń basyna qaraı kinálilerge úkim shyǵarylady», - dedi D. Músilimov.
