SQO-da ınvestorlardyń quqyǵyn buzǵandar jazalandy

PETROPAVL. KAZINFORM — Soltústik Qazaqstan oblysynyń prokýratýrasy ınvestorlarǵa qatysty shekteý sharalary bar 75 materıaldy qarap, negizsiz qysym jasaý áreketteriniń jolyn kesti. 

SQO prokýratýrasynyń málimetinshe, óńirde ınvestıtsııalyq ahýaldy jaqsartýǵa baǵyttalǵan júıeli jumys júrgizilip keledi. Sonyń biri «prokýrorlyq súzgi» tetigi. Bul bastamanyń maqsaty — baqylaýshy jáne quqyq qorǵaý organdary tarapynan bızneske, sonyń ishinde ınvestorlarǵa qysymnyń jasalýyna jol bermeý.

Prokýrorlar oblys boıynsha ınvestorlarǵa qatysty shekteý sharalary bar 75 materıaldy qarap shyqty. Nátıjesinde, 10 jaǵdaıda ınvestorlardyń ákimshilik jaýapkershilikke negizsiz tartylǵany anyqtalyp, bul sheshimder kúshin joıdy. Sonymen qatar, zańsyz júrgizilgen eki tekserý faktisi de toqtatyldy.

Odan bólek, «Ákimshilik quqyq buzýshylyqtardyń biryńǵaı tizilimi» aqparattyq júıesiniń monıtorıngi barysynda prokýrorlardyń kelisiminsiz 5 ınvestorǵa qatysty ákimshilik is qozǵaý týraly 22 zań buzýshylyq deregi tirkeldi. Oǵan memlekettik kirister jáne polıtsııa organdarynyń laýazymdy tulǵalary jol bergen.

Anyqtalǵan zańsyzdyqtardyń barlyǵyna qatysty prokýratýra shara qoldanyp, zańsyz qaýlylardyń kúshin joıdy, ákimshilik ister toqtatyldy. Zańsyzdyqtarǵa jol bergeni úshin 4 laýazymdy tulǵa tártiptik jaýapkershilikke tartyldy, onyń ishinde Aqqaıyń aýdany boıynsha Memlekettik kirister basqarmasynyń basshysy da bar.

Buǵan deıin SQO-da múgedektigi bar tulǵalarǵa zańsyz salyq salynǵanyn jazǵan edik.