SQO-da «ınvestıtsııaǵa» qarjy salǵan zeınetker 7 mln teńgesinen aıyryldy
PETROPAVL. KAZINFORM - Soltústik Qazaqstan oblysynda polıtsııa qyzmetkerleri iri kólemdegi ınternet-alaıaqtyq faktisin tergep jatyr.
Vedomstvonyń málimetinshe, Petropavldyń 77 jastaǵy turǵyny alaıaqtardyń quryǵyna túsip, jınaǵan barlyq qarajatynan aıyrylǵan.
Zeınetker Instagram áleýmettik jelisinde ınvestıtsııa arqyly joǵary tabys tabý týraly jarnamany kórgen. Qyzyǵýshylyq tanytqan áıel kórsetilgen silteme arqyly ótip, baılanys derekterin qaldyrǵan.
Kóp uzamaı oǵan ózin ınvestıtsııalyq kompanııa ókilderi retinde tanystyrǵan adamdar habarlasqan. Olar túrli tásildermen senimge kirip, ınvestıtsııalyq jobaǵa qarjy salý arqyly qysqa merzimde qomaqty paıda tabýǵa bolatynyn aıtqan, aqsha salýǵa kóndirgen.
Sáýir aıynyń sońy men mamyr aıynyń basy aralyǵynda alaıaqtar áıeldi birneshe márte aqsha aýdarýǵa ıtermelegen. Saldarynan zeınetker barlyq jınaǵan qarajatyn belgisiz esepshottarǵa jibergen. Materıaldyq shyǵyn kólemi 7 mln teńgeden asqan.
Qomaqty qarjyny qolǵa túsirgennen keıin alaıaqtar baılanysqa shyǵýdy toqtatqan. Sol kezde ǵana ózin aldanǵanyn túsingen qala turǵyny quqyq qorǵaý organdaryna júgingen.
Qazirgi ýaqytta osy derek boıynsha sotqa deıingi tergep-tekserý amaldary júrip jatyr. Polıtseıler jábirlenýshiniń aqshasyn elden shyǵarýǵa paıdalanylǵan shot ıeleri - úsh dropperdi anyqtady. Áıeldiń azamattyq sot isin júrgizý tártibimen olardan keltirilgen shyǵyndy óndirip alýǵa múmkindigi bar.
Polıtseıler azamattardy egde jastaǵy týystary men jaqyndaryn ınternet-alaıaqtyq qaýpi týraly eskertýge shaqyrady. Internettegi habarlandyrýlarǵa saqtyqpen qarap, kúmán týdyratyn tıimdi usynystarǵa senbeý qajet. Sondaı-aq qarjy salýǵa qatysty kez kelgen aqparatty tek resmı jáne senimdi derekkózder arqyly tekserý qajettigin eskertedi.
Buǵan deıin Qyzylorda turǵyny adamdardyń jeke derekterin paıdalanyp, alaıaqtyq jasaǵanyn jazǵan edik.
