SQO-da «ınvataksı» qyzmeti Petropavl men bir aýdanda ǵana bar

PETROPAVL. KAZINFORM — Soltústik Qazaqstan oblysynda múgedektigi bar adamdarǵa arnalǵan «ınvataksı» qyzmeti Petropavl men Ýálıhanov aýdanynda ǵana jumys istep keledi.

SQO jumyspen qamtýdy úılestirý jáne áleýmettik baǵdarlamalar basqarmasynyń málimetinshe, «ınvataksı» qyzmeti memlekettik áleýmettik tapsyrys aıasynda 2009 jyldan bastap iske asyrylyp keledi. 

Biraq tegin jol júrýge múmkindik beretin bul qyzmet basqa aýdandarda jabylyp qalǵan. 

Mamandardyń aıtýynsha, áleýmettik taksıdiń qyzmeti birinshi jáne ekinshi toptaǵy múgedektigi bar adamdarǵa, sondaı-aq aýrýdyń túrnine qaramastan, on segiz jasqa deıingi múgedektigi bar balalarǵa qoljetimdi.

Bul qyzmetti kórsetý protsesiniń ashyqtyǵyn arttyrý jáne avtomattandyrý maqsatynda qazir ony Áleýmettik qyzmetter portalyna biriktirý boıynsha jumys júrgizilip jatyr. 

— Bıyl «ınvataksı» qyzmetin paıdalanýǵa aı saıynǵy lımıt engizilgenin atap ótken jón. Múgedektiktiń birinshi jáne ekinshi toptaryna jatatyn, sonyń ishinde qol arbamen júretin, jumys isteıtin, bilim alatyn jáne mektepke deıingi uıymdardyń tárbıelenýshilerine, sondaı-aq on segiz jasqa deıingi jumys isteıtin jáne bilim alatyn múgedektigi bar balalarǵa lımıt aıyna 25 saǵat bolyp bekitildi, — deıdi basqarma ókilderi.

Al belgili bir baǵyttar boıynsha júretin múgedektigi bar ózge de adamdar úshin aıyna 6 saǵattyq lımıt belgilengen.

— Qajettilik bolǵan jaǵdaıda jáne jergilikti bıýdjettiń múmkindikterin eskere otyryp, jergilikti deńgeıde belgilengen saǵat sanyn jáne bir sapardyń uzaqtyǵyn ulǵaıtý týraly máseleni qaraýǵa múmkindik bar, — deıdi mamandar.

SQO-da qazirgi ýaqytta 24 myńǵa jýyq múmkindigi shekteýli adam bolsa, sonyń 2450-ge jýyǵy — bala.

Buǵan deıin jasandy ıntellekt múgedektik dárejesin anyqtaý úshin qoldanylýy múmkin ekenin jazǵan edik.