SQO-da ınternet arqyly 15 adamdy san soqtyrǵan jigit ustaldy
SQO polıtsııa departamenti baspasóz qyzmetiniń málimetinshe, ótken jyldyń qyrkúıek aıynda Petropavl turǵyny ınternettegi habarlandyrý arqyly magnıtola satyp almaqshy bolady. Kelisim boıynsha aldyn ala tólem jasap, 80 myń teńgesin aýdarǵan. Keıin «satýshy» baılanysqa shyqpaı qoıǵan.
Jedel-izdestirý is-sharalary barysynda Petropavl qalalyq polıtsııa basqarmasy birinshi polıtsııa bóliminiń qyzmetkerleri kúdiktini anyqtady. Ol Pavlodar qalasynyń 21 jastaǵy turǵyny eken. Mán-jaıdy anyqtaý kezinde ustalǵannyń uqsas qylmystarǵa qatystylyǵy tekserildi. Jedel ýákilder materıaldardy pavlodarlyq áriptesterine jiberdi. Kúdiktiniń Shyǵys Qazaqstan jáne basqa oblystarda jasalǵan 15 ınternet-alaıaqtyqqa qatysy bolýy múmkin. Qylmys jalǵan taýarǵa aldyn ala tólemdi talap etý arqyly jasalǵan, taýar retinde tehnıka, asyl tuqymdy marǵaýlar jáne taǵy basqalar usynylǵan.
«Búgingi tańda ınternet-alaıaqtyq beleń alǵan. Bul qylmys túrin ashýda óz qıyndyqtary bar. Desek te tıisti jumystar atqarylyp jatyr. Máselen, oblys aýmaǵynda sáýir aıynyń sońynda ótkizilgen «Kontrafakt» respýblıkalyq jedel-profılaktıkalyq is-sharasy aıasynda buryn jasalǵan 11 ınternet-alaıaqtyq ashyldy. Internettegi taýar men qyzmet úshin aldyn ala tólemdi jibermeı turyp, teksergen jón, jurttyń pikirlerine mán bergen durys», - dedi SQO PD krımınaldyq polıtsııa basqarmasynyń bastyǵy Marat Jumalıev.
Jalpy jyl basynan SQO-da 279 ınternet-alaıaqtyq tirkelip, búgingi tańda 77-si, ıaǵnı shamamen ár úshinshisi ǵana ashyldy.