SQO-da ınternet alaıaqtyq 23 paıyzǵa tómendedi
PETROPAVL. KAZINFORM — Jyl basynan beri Soltústik Qazaqstan oblysynda dropperlikke baılanysty 200-ge jýyq qylmystyq is tirkeldi.
SQO Polıtsııa departamenti baspasóz qyzmetiniń málimetinshe, ınternet alaıaqtyqtyń árbir dereginde birneshe dropperden turatyn tizbek bar. Olar jábirlenýshilerdiń aqshasyn bank kartalary arqyly qylmyskerlerge elden shyǵarý úshin paıdalanatyn adamdar. Jekelegen epızodtarda mundaı tizbektegi dropperdiń sany 15 adamǵa deıin jetedi.
Dropperlikke kámelettik jasqa tolmaǵandardy da tartyp jatady. Mundaı jaǵdaılardyń aldyn alý maqsatynda polıtseıler biryńǵaı profılaktıka kúni aıasynda aýqymdy aktsııa ótkizdi. Polıtsııa bólimsheleriniń qyzmetkerleri prokýratýra ókilderimen jáne qala ákimdiginiń Jastar resýrstyq ortalyǵynyń volonterlerimen birlesip, oqýshylarmen kezdesý ótkizý úshin mektepter men kolledjderge bardy. Olar balalarǵa jadynamalar taratyp, «ońaı aqshanyń» qandaı qaýip tóndiretinin túsindirdi.
— Keıbir joǵary synyp oqýshylary men stýdentter dropperlik úshin qylmystyq jaýapkershilik kózdelgenin bilmeıdi eken. Bireýge syıaqy úshin bank kartalaryn rásimdeý, óz shottary arqyly basqa adamǵa belgili bir somany paıyzǵa aýdarý qylmys bolýy múmkin. Zańda mundaı áreketter úshin iri mólsherdegi aıyppuldan bastap 7 jylǵa deıin bas bostandyǵynan aıyrý jazasy kózdelgen. Sonymen qatar zańda belgilengen negizder bolǵan jaǵdaıda azamattyq sot dropperdi alaıaqtyqtan jábirlenýshige keltirilgen zalaldy óteýge mindetteı alady, — deıdi polıtsııa qyzmetkerleri.
SQO-da ár aıdyń 15-i — biryńǵaı profılaktıka kúni. Osyǵan oraı barlyq múddeli memlekettik organdar halyqtyń qarjylyq saýattylyǵyn arttyrýǵa jáne ınternet-alaıaqtyqtyń aldyn alýǵa baǵyttalǵan aýqymdy is-sharalarǵa qatysady. 8 aıdyń qorytyndysy boıynsha oblysta ınternet alaıaqtyq qylmysy 23% tómendedi.
Buǵan deıin ınternet alaıaqtardan qalaı qorǵanýǵa bolatynyn jazǵan edik.
