SQO-da ınternet alaıaqtardyń jańa tásilinen 13 adam zardap shekti
PETROPAVL. KAZINFORM - Soltústik Qazaqstan oblysynda ınternet alaıaqtar IT-kompanııalardyń atyn jamylyp, «antıvırýstyq baǵdarlama» ornatamyz dep, turǵyndardy aldap jatyr.
SQO Polıtsııa departamenti baspasóz qyzmetiniń málimetinshe, shyn máninde, jábirlenýshi alaıaqtardyń aıtýymen telefonyna qashyqtan basqarýǵa múmkindik beretin qosymshany ornatady. Saldarynan qylmyskerler adamnyń telefonyn tolyq baqylap, barlyq shottaryndaǵy qarajatty ıemdenedi.
Jyl basynan beri oblystyń 13 turǵyny alaıaqtardyń osy jańa shemasyna senip qalǵan. Keltirilgen shyǵyn mólsheri 560 myńnan 2 mln teńgege deıin jetken.
Osyǵan oraı polıtseıler qazir kıberqylmystyń tásilderi týraly turǵyndardy eskertý maqsatynda eńbek ujymdarymen profılaktıkalyq kezdesýler ótkizip jatyr. Tártip saqshylary beıtanys derekkózderden qosymsha ornatýǵa bolmaıtynyn eskertedi. Alaıaqtar «nesıeni tez qaıta qarjylandyryp, joıýǵa kómektesetin baǵdarlama» sekildi túrli jalǵan ýádeler berýi múmkin. Saldarynan adam óz telefonyna «AnyDesk», «TeamViewer», «HopToDesk», «AirDroidControl» nemese basqa da qashyqtan qol jetkizýge arnalǵan qosymshalardy ornatyp, jınaǵan qarajatynan aıyrylyp qalady.
Jalpy, jyl basynan beri SQO-da ınternet alaıaqtyqtyń 214 faktisi tirkeldi.
Buǵan deıin Qaraǵandy oblysynda ınternet-alaıaqtyqtyń 335 faktisi tirkelgenin jazǵan edik.
