SQO-da «ınternet-alaıaqtar» turǵyndardyń bank kartasynan aqsha alǵan
PETROPAVL. QazAqparat - Soltústik Qazaqstan oblysynyń polıtsııa qyzmetkerleri óńir turǵyndaryn ınternet-alaıaqtardan saq bolýǵa shaqyrady, dep habarlaıdy «QazAqparat» HAA tilshisi SQO ІІD baspasóz qyzmetine silteme jasap.
Quzyrly vedomstvonyń habarlaýynsha, OLX, «Krysha.kz», «Kolesa.kz», tipti áleýmettik jeliler arqyly alaıaqtar aqsha tabýdyń amalyn taýyp alǵan.
«Olar satyp alýshy adam retinde aldyn ala aqshasyn berip jiberetinderin aıtyp, satýshylardy sendiredi. Taýarynyń ótetinine senip qalǵan satýshy JSN túgili, jeke nómirin, bank kartasynyń nómiri, tipti bankten SMS kúıinde keletin rastaýshy kod paroldaryn da aıta salady. Bul qaqpannan keıin ákki alaıaqqa bótenniń aqshasyn ózine aýdaryp alý amaly ǵana qalady», - dep habarlaıdy SQO ІІD baspasóz qyzmeti.
Máselen, Petropavl qalasynyń turǵyny qysqy kúrtesin satatynyn aıtyp, saıtqa habarlama qaldyrǵan. Alaıaq satyp alýshynyń aldyn ala «salyp jiberetin» 50 teńgesi túgili, qala turǵyny óziniń zeınetaqy alyp otyrǵan kartochkasynan 20 myń teńgeniń qalaısha izim-ǵaıym joq bolyp ketkenin baıqamaı qalǵan kórinedi.
«Ózińizge tıesili qupııa nómirlerdi jasyryp ustańyz. Beıtanys adamdardyń aldyn ala saýdasyna kelispeńiz. Sizdiń taýaryńyzdy satyp alǵysy kelgen adam qolma-qol da beredi. WhatsApp nemese ózge de messendjerler arqyly kartochkańyzdyń nemese túbirtekterdi jibermeńiz», - dep saqtandyrady SQO ІІD qylmystyq polıtsııa basqarmasynyń bastyǵy Petr Klımov.
Vedomsto jyl basynan beri Petropavlda 7 qala turǵyny ınternet-alaıaqtarǵa aldanyp qalǵanyn habarlaıdy.
