SQO-da ınternet alaıaqtar turǵyndarǵa 618 mln teńge shyǵyn keltirdi
PETROPAVL. KAZINFORM – Soltústik Qazaqstan oblysynda ınternet alaıaqtyq faktileri azaıǵanymen, materıaldyq shyǵyn kólemi áli de joǵary.
SQO Polıtsııa departamenti baspasóz qyzmetiniń málimetinshe, bıyl bes aı ishinde 247 ınternet alaıaqtyq deregi tirkelgen. Bul ótken jyldyń sáıkes kezeńimen salystyrǵanda 8% tómen. Alaıda turǵyndar jalpy somasy 618 mln teńgeden astam qarjy joǵaltqan.
Tártip saqshylarynyń aıtýynsha, alaıaqtar kommýnaldyq qyzmet, baılanys kompanııalary, emhanalar men poshta qyzmetkerleriniń atyn jamylyp áreket etýdi jıiletken. Olar turǵyndarǵa qońyraý shalyp, elektr nemese gaz eseptegishin aýystyrý qajet ekenin aıtady. Keı jaǵdaıda ózderin baılanys operatorlarynyń nemese domofon kompanııalarynyń qyzmetkeri retinde tanystyryp, kelisimshartty uzartý nemese kiltterdi jańartý qajettigin habarlaıdy. Alaıaqtar emhana qyzmetkerleri bolyp habarlasyp, skrınıngten ótý, qan tapsyrý nemese medıtsınalyq tekserýden ótý qajet ekenin aıtady. Sondaı-aq jalǵan poshta qyzmetkerleri sálemdeme nemese aqsha aýdarymy kelgenin habarlap, SMS arqyly kelgen tórt tańbaly kodty suratady.
Budan bólek, ınternet arqyly taýar satyp alý jáne satý kezinde aldaý, joǵary tabys ýáde etetin jalǵan ınvestıtsııalyq jobalar, áleýmettik jelilerdegi akkaýnttardy buzý jáne fıshıngtik saıttar arqyly derekterdi urlaý faktileri de jıi kezdesedi.
Polıtsııa turǵyndarǵa eshkimge SMS-kodtardy, bank kartasynyń derekterin jáne qupııasózderdi bermeýge keńes beredi. Sondaı-aq beıtanys adamdardyń nusqaýymen aqsha aýdarmaý, kúmándi siltemelerge ótpeý jáne tekserilmegen qosymshalardy júktemeý qajettigin eskertedi.
SQO-da ár aıdyń 15-i halyqtyń qarjylyq saýattylyǵy jáne biryńǵaı profılaktıka kúni bolyp jarııalanǵan. Osy kúni barlyq memlekettik organdar men mekemelerde turǵyndardyń qarjylyq jáne tsıfrlyq qaýipsizdik deńgeıin arttyrýǵa baǵyttalǵan profılaktıkalyq is-sharalar ótkiziledi.
Buǵan deıin SQO-da 30-dan astam ınternet alaıaqtyqqa qatysy bar bes «dropovod» sottalǵanyn jazǵan edik.
