SQO-da ınsýlt alǵan er adam 4 syrqatqa donor boldy
PETROPAVL. KAZINFORM – Soltústik Qazaqstan oblysynyń 62 jastaǵy turǵynynyń aǵzalary týystarynyń ruqsatymen 4 adamǵa salyndy.
SQO densaýlyq saqtaý basqarmasy baspasóz qyzmetiniń málimetinshe, 62 jastaǵy óńir turǵyny aýrýhanaǵa ınsýltpen jetkizilip, komaǵa túsken. Dárigerler ınsýlt saldarynan onyń mıynyń ólgenin rastady. Medıtsınalyq brıgada jáne transplantatsııa úılestirýshisimen sóıleskennen keıin er adamnyń týǵan-týystary aǵza donorlyǵyna kelisim berdi, osylaısha qajetti aǵzany kútý tiziminde turǵan birneshe syrqattyń ómirin uzartty.
3 aqpan kúni respýblıkalyq medıtsınalyq avıatsııa jelisi boıynsha «University Medical Center» korporatıvtik qorynyń «Júrek ortalyǵynan» jáne «Ulttyq ǵylymı onkologııalyq ortalyq» JShS-nen 6 adamnan turatyn transplantologtar brıgadasy kelip, organdardy iriktep aldy. Keıin Astananyń klınıkalarynda 4 patsıentke aǵzalardy transplantatsııalaý sátti júrgizildi.
Almaty qalasynan kelgen 54 jastaǵy er adam júrek retsıpıenti boldy. Oǵan buǵan deıin LVAD qan aınalymyn qoldaıtyn mehanıkalyq qurylǵy ımplantatsııalanǵan eken. Osy qurylǵynyń arqasynda júrek jetkiliksizdiginiń sońǵy satysyndaǵy syrqat qajetti aǵza transplantatsııasyn kúte aldy.
- Qurylǵy qoıylǵannan keıin naýqas qajetti dári-dármekterdi qabyldap, únemi tekserýden ótip turdy. Júrekti ol 4 jyl boıy kútti. Donorlyq organ men syrqattyń úılesimdiligi maksımaldy sáıkestikti kórsetti. Biz naýqasqa qońyraý shalyp, júrek transplantatsııasy týraly jańalyqty habarladyq. Ol qýanyp, ári tolqyp, operatsııaǵa daıyndalý úshin dereý klınıkaǵa keldi, - dedi UMC júrek ortalyǵynyń kardıolog dárigeri Naıl Hısamýtdınov.
Buǵan deıin Almaty oblysynda qaıtys bolǵan donor 4 adamnyń ómirin saqtap qalǵanyn jazǵan edik.
