SQO-da ınfektsııalyq statsıonarlardaǵy syrqat sany sońǵy on kúnde 10 paıyzǵa artty

PETROPAVL. QazAqparat – Soltústik Qazaqstan oblysynda ótken táýlikte koronavırýs juqtyrýdyń 143 jaǵdaıy tirkeldi. Qańtar aıynan bastap ınfektsııalyq statsıonarlarǵa bir táýlikte jatqyzylatyn syrqattar sany 10 %-ǵa artqan, dep habarlaıdy QazAqparat tilshisi.

SQO densaýlyq saqtaý basqarmasynyń málimetinshe, 18 qańtar kúni oblysta 1100 adam PTR-test tapsyrsa, sonyń 143-inde nátıje oń boldy. Qazir ınfektsııalyq statsıonarlardaǵy 1300 orynnyń 238-inde syrqattar jatyr, taǵy 21-i jansaqtaý bólimine ornalastyrylǵan. 11-iniń hali aýyr, ókpeni jasandy jeldetý apparatyna qosylǵan. Sondaı-aq 900-ge jýyq adam dárigerlerdiń baqylaýyna alynyp, ambýlatorlyq em qabyldap jatyr. Jalpy pandemııa bastalǵaly 35 660 adam koronavırýs juqtyrdy, 33 246-sy táýir bolǵandardyń qataryna qosyldy. Al qaıtys bolǵandar sany 457-ge jetti.

«Qarasha aıynyń ortasynan bastap, jeltoqsan aıynyń sońyna deıin óńirde epıdahýal turaqtanyp, KVI juqtyrýshylar sany azaıdy. Nátıjesinde ınfektsııalyq statsıonarlardaǵy oryn sanyn qysqarttyq. Oblys boıynsha emdeý mekemelerinde 160 syrqat qalyp, statsıonarlar 12 %-ǵa ǵana júkteldi. Al 10 qańtardan bastap aýrýshańdyq kúrt artty. KVI juqtyrǵandar sany kúnnen-kúnge artyp keledi. Ótken aptada ınfektsııalyq statsıonarlarda jatqandar sany 160 adamnan 221-ge deıin kóbeıdi. Buǵan deıin statsıonarlarǵa táýligine 25 syrqatqa deıin jatqyzsaq, qazir 28 adamǵa deıin qabyldaımyz», - deıdi SQO densaýlyq saqtaý basqarmasy basshysynyń mindetin atqarýshy Nurlan Aımanov.

Buǵan deıin ambýlatorlyq syrqattardyń kóbeıýine baılanysty mobıldi brıgalardyń sany 54-ten 88-ge deıin arttyrylǵanyn aıtqan edik. Qazir bir brıgada kúnine 12 shaqyrtýǵa deıin barady.

Sondaı-aq mamandar koronavırýstyń jańa tolqynyna ázirlik jaıynda baıandap berdi.