SQO-da ınfektsııalyq statsıonarlar jabylyp jatyr
PETROPAVL. QazAqparat – Soltústik Qazaqstan oblysynda koronavırýs ınfektsııasyn juqtyrǵandardyń azaıýyna baılanysty statsıonarlarda jatyn oryndar sany qysqartylyp jatyr, dep habarlaıdy QazAqparat tilshisi.
SQO Densaýlyq saqtaý basqarmasy baspasóz qyzmetiniń málimetinshe, búgin Ýálıhanov aýdanyndaǵy 10 orynǵa shaqtalǵan ınfektsııalyq statsıonar jumysyn toqtatty. Budan basqa ınfektsııalyq oryndar oblystyq kópsalaly balalar aýrýhanasynda 75-ke, oblystyq kópsalaly aýrýhanada 15-ke qysqardy.
Buǵan deıin Petropavldaǵy joǵary oqý ornynyń jataqhanalarynyń birinde ashylǵan provızorlyq statsıonardyń jabylǵanyn aıtqan edik. 300 orynǵa shaqtalǵan emdeý mekemesi oblysta koronavırýsty ınfektsııa órshigende, shildeniń basynda jedel túrde quryldy.
Jaǵdaıdyń turaqtalýyna baılanysty óńirdegi provızorlyq statsıonarlarda jatyn oryndar birtindep qysqartylyp jatyr. Máselen: oblystyq kópsalaly balalar aýrýhanasynda 30 orynǵa, dál sonsha qalalyq kópsalaly aýrýhanada, taǵy 15-ten Aıyrtaý men Tımırıazev aýdandarynda jáne Aqjar aýdanynda 10 orynǵa azaıdy.
Nátıjesinde SQO-da qazirgi ýaqytta ınfektsııalyq statsıonarlarda 480 oryn, provızorlyq ortalyqtarda barlyǵy 1235 oryn jáne shekaralas aýmaqtarda 50 karantındik oryn bar.
Búgingi tańda óńirde 200 naýqas ınfektsııalyq statsıonarda em alyp jatyr, provızorlyq statsıonarlardaǵy syrqattardyń sany – 274.
