SQO-da ınfektsııalyq statsıonarlar 10 kún ishinde 36 paıyzǵa toldy
PETROPAVL. QazAqparat – Soltústik Qazaqstan oblysynda koronavırýsty juqtyrǵandar sany artyp keledi. Qazir emdeý mekemelerinde 200-ge jýyq adam em alyp jatyr, dep habarlaıdy QazAqparat tilshisi.
SQO densaýlyq saqtaý basqarmasy basshysynyń orynbasary Qumar Kúsemisovtiń aıtýynsha, 1 sáýirde statsıonarlar 28 %-ǵa deıin ǵana tolsa, búgingi kórsetkish - 36 %. 194 adam em alýda. Syrqattardyń basym bóliginde koronavırýs aýyr ótip jatyr.
«Qazir oblysta 9 myńnan astam vaktsına bar. Kelesi aptada taǵy jetkiziledi.
Sol sebepti barlyǵyn ekpe alýǵa shaqyramyn. Vaktsınatsııa – búgingi tańda koronavırýspen kúrestiń eń tıimdi joly. Ekpe alyp qana biz bul vırýsqa toıtarys beremiz, ári qaraı taralýyn toqtatamyz. Vırýs juqqan jaǵdaıda da jeńil ótedi», - deıdi Qumar Kúsemisov.
Oblysqa aqpan aıynan beri 16,5 myń reseılik vaktsına jetkizildi. Qazirgi ýaqytta oblys turǵyndarynyń 7 myńy ekpe aldy.
«Vaktsınany aǵza jeńil qabyldaıdy. Ekpe alǵannan keıin ýshyǵý jaǵdaılary oblysta, respýblıkada tirkelgen joq. Vaktsına egilgennen keıin azdap dene qyzýy kóterilip, álsizdik paıda bolýy múmkin. Bul alǵashqy eki-úsh kúnde baıqalady.
Vaktsınany alý úshin emhanalar arqyly aldyn ala jazylý qajet.
Elektrondy úkimettiń portalynda eGov arqyly da ekpe alýǵa ótinish qaldyrýǵa bolady. Ol ótinish avtomatty túrde qaralyp, kezekke qoıylady.
Sol sebepti eGov arqyly belgili bir kúnge, ýaqytqa jazylýǵa bolmaıdy», - deıdi basqarma ókili.
