SQO-da ınfektsııalyq statsıonar nelikten bir kúnde jabylǵany túsindirildi
PETROPAVL. QazAqparat – Soltústik Qazaqstan oblysy Qyzyljar aýdanyndaǵy ınfektsııalyq statsıonar bir kúnde jabylyp, ondaǵy syrqattar Petropavlǵa kóshirildi.
Nelikten mundaı sheshim qabyldanǵany jaıynda oblystyq Densaýlyq saqtaý basqarmasy túsinik berdi, dep habarlaıdy QazAqparat tilshisi.
SQO Qyzyljar aýdanynda ınfektsııalyq statsıonardyń jabylǵandyǵy jónindegi aqparat áleýmettik jelide kópshiliktiń narazylyǵyn týdyrdy. Oblystyq Densaýlyq saqtaý basqarmasyna osy sheshimge qatysty túsinik berýge týra keldi.
«Aýyrǵandar kúrt kóbeıgen jaǵdaıda qosymsha ınfektsııalyq statsıonar bir kúnde qurylady. Sondaı tártipte jabylady da. Óz tártibi bar. Sondyqtan eshqandaı dúrlikpe bolǵan joq, shtattyq rejımde atqaryldy», - deıdi SQO Densaýlyq saqtaý basqarmasy basshysynyń orynbasary Qumar Kúsemisov.
Aýdandyq aýrýhanadaǵy ınfektsııalyq bólimsheni jabýǵa koronavırýs ınfektsııasyn juqtyrǵandar sanynyń azaıýy sebep bolǵan.
«Oblysta aýyrǵandar sany táýligine ortasha eseppen 110-nan 60-qa deıin tómendedi. Jaǵdaı turaqtaldy. Infektsııalyq statsıonarǵa táýligine orta eseppen buryn 60-65 adam tússe, bul kórsetkish eki ese azaıdy. Qajettilik bolmaǵannan keıin jáne qalalyq ınfektsııalyq statsıonarlarǵa jaqyn ornalasqandyqtan Qyzyljar aýdandyq ortalyq aýrýhanasyndaǵy ınfektsııalyq bólimshe jabyldy», - dedi Qumar Kúsemisov.
Qyzyljar aýdanyndaǵy ınfektsııalyq bólimshe ekinshi deńgeıdegi statsıonarlarǵa jatady. Ol jerde KVI-diń jeńil jáne ortasha túrimen aýyrǵandar em alady. Oblystyq statsıonarlar birinshi deńgeıge jatady, ol jerde qatty aýyrǵan naýqastarǵa kómek kórsetiledi.
«Oblys boıynsha 6 ınfektsııalyq statsıonar bar. Onyń tórteýi oblys ortalyǵynda, qalǵan ekeýi Taıynsha jáne Ǵ.Músirepov aýdandarynda. Olar Petropavldan alys ornalasqandyqtan birneshe aýdanǵa qyzmet kórsetedi. Olardy jappaımyz», - dedi basqarma basshysynyń orynbasary.
Qumar Kúsemisovtyń aıtýynsha, Qyzyljar aýdandyq aýrýhanasyndaǵy ınfektsııalyq statsıonardan ınfektsııalyq aýrýhanaǵa kóshirilgen bir syrqat qaıtys boldy.
«Syrqat 1945 jyly týǵan. Aýdandyq ınfektsııalyq statsıonardan kóshirilgennen keıin bir táýlikten keıin kóz jumdy. Qyzyljar ınfektsııalyq statsıonary ekinshi deńgeıli, sol sebepti naýqastardyń jaǵdaıy aýyrlaǵanda olar oblys ortalyǵyna, jaqsy jaraqtandyrylǵan birinshi deńgeıli ınfektsııalyq statsıonarlarǵa kóshiriledi. Sol sebepti bul syrqatty qalaı bolǵanda da oblys ortalyǵyna aýystyrar edi», - dedi oblystyq densaýlyq saqtaý basqarmasy basshysynyń orynbasary Qumar Kúsemisov.
