SQO-da «inDriver» júrgizýshisi esirtki qoldanyp, jolaýshy tasymaldaǵan
SQO Polıtsııa departamenti baspasóz qyzmetiniń málimetinshe, esirtkige elitken kólik júrgizýshisi «Qarasora-2020» jedel-profılaktıkalyq is-sharasy aıasynda qolǵa tústi. Esirtki qylmysyna qarsy is-qımyl basqarmasynyń qyzmetkerleri Petropavl qalasynan shyǵyp kele jatqan avtokólikti teksergen. «BMW» rýlinde Ǵ. Músirepov atyndaǵy aýdannyń ortalyǵy Novoıshımskoe eldimekeniniń 43 jastaǵy turǵyny bolǵan. Kólik salonynda júrgizýshiden bólek, 3 jolaýshy bolǵan.
Kólikti qaraý kezinde shyntaqqoıǵyshtyń ishinen 2 polıetılen paketke salynǵan ósimdik tektes zat alyndy. Esirtki izdeýge mashyqtanǵan Bých atty spanıel ıt ony birden tapty. Saraptama alynǵan zattyń jalpy salmaǵy 220 gramm esirtki ekenin kórsetti. Kólik júrgizýshisi buǵan deıin de birneshe márte isti bolǵan eken.
Budan bólek, júrgizýshini tekseristen ótkizý barysynda onyń esirtkige elitkeni anyqtaldy. Ol «inDriver» qosymshasy arqyly eki jolaýshyny almastan buryn marıhýana shekkenin rastady. Sózine qaraǵanda, esirtkini 2 jyl boıy qoldanyp keledi.
SQO PD Esirtki qylmysyna qarsy is-qımyl basqarmasy bastyǵynyń orynbasary Ivan Terzıdıdiń sózinshe, júrgizýshige qatysty QR Ákimshilik quqyq buzýshylyqtar týraly kodeksiniń 608-baby boıynsha ákimshilik hattama toltyryldy. Ustalǵan adam Petropavl qalasynyń sotymen 15 táýlikke qamaqqa alynyp, kólik basqarý quqyǵynan 7 jylǵa aıyryldy.
Buǵan deıin soltústikqazaqstandyq saqshylar kólikti esirtkilik mas kúıde júrgizýdiń úsh deregin anyqtaǵan edi.