SQO-da ıis tıgen eki adam jansaqtaý bólimine tústi
PETROPAVL. QazAqparat – Soltústik Qazaqstan oblysynda áıel men onyń qyzyna ıis tıip, jansaqtaý bólimine tústi, dep habarlaıdy QazAqparat tilshisi.
SQO Tótenshe jaǵdaılar departamenti baspasóz qyzmetiniń málimetinshe, oqıǵa búgin Tımırıazev aýdanynyń ortalyǵy Tımırıazev aýylynda bolǵan. Tańǵy 7.30-dar shamasynda eldimekendegi №18 órt sóndirý bóliminiń baılanys beketine eki adamǵa ıis tıgendigi jóninde habar túsken. Zardap shekken 1973 jyly týǵan áıel men onyń 2009 jyly týǵan qyzy aýdandyq ortalyq aýrýhananyń jansaqtaý bólimine jetkizildi.
Mamandardyń aıtýynsha, oqys oqıǵa jeke turǵyn úıde bolǵan. Ýly gazdyń taralýyna peshtiń tútindiginiń bitelip qalýy sebep.
Qazir zardap shekkenderdiń ómirine keler qaýip joq, jaǵdaılary jaqsy.
Osyndaı oqys oqıǵalar qaıtalanbaýy úshin oblystyń tótenshe jaǵdaılar departamenti turǵyndardy qarapaıym saqtyq sharalaryn umytpaýǵa shaqyrady.
