SQO-da ıesiz júrgen 3600-den astam mal aıyp turaǵyna qamaldy

PETROPAVL. QazAqparat – Soltústik Qazaqstan oblysynda baǵýsyz erkin jaıylymda júrgen maldyń ıeleri jazalanyp jatyr, bıyl 900-den astam adamǵa aıyppul salyndy, dep habarlaıdy QazAqparat tilshisi.

SQO polıtsııa departamenti baspasóz qyzmetiniń málimetinshe, jyl basynan óńirde 19 mal urlyǵy tirkeldi. Urlyqtyń 91,7 % ashyldy.

Kóbine urylardy jylqy men qoı qyzyqtyrady eken. Qylmyskerler jylqyny erkin jaıylymnan aıdap áketse, qoıdy jazǵy shashpadan shyǵaryp alady.

Erkin, baǵýsyz júrgen mal urylarǵa ońaı olja. Sondyqtan tártip saqshylary túlikti bos qoıa beretindermen kúresti kúsheıtken.

Jyl basynan aýylsharýashylyq janýarlaryn baǵý qaǵıdalaryn buzǵany úshin 1358 quqyq buzýshy ákimshilik jaýapkershilikke tartyldy.

Onyń 432-si eskertý alsa, qalǵanyna aıyppul salyndy. Oblysta malǵa arnalǵan 230 aıyp turaǵy bar.

Jyl basynan erkin jaıylymnan oǵan 3600-den asa mal qamaldy.

«Eger jylqylardy daladan aıdap áketip jatsa, qoılardy aýlada júrgen jerinen urlap ketedi. Usaq qara maldy aýyl turǵyndardy jóndi bekitilmegen shashpalarda qaldyrady. Urylar aýyl shetindegi sharýashylyqty tańdap, avtokólikti paıdalana otyryp, jyldam áreket etedi. Kúz kele jatyr, mal urlyǵy órshıtin kez. Sondyqtan turǵyndardy shashpalardy myqtap bekitýge, erkin jaıylymdaǵy maldardy qaraýsyz qaldyrmaýǵa jáne múmkindiginshe beınebaqylaý kameralaryn, sondaı-aq úıirdi bastaıtyn aıyrlarǵa GPS-trekerler taǵýǵa keńes beremiz», - deıdi SQO PD bastyǵynyń orynbasary Rýslan Nazarov.